Ang mga tinugyanan sa Department of Education sa lalawigan sa Sugbu mipadayag nga magkinahanglan og pagtuon ang sugyot sa nagkadaiyang sektor nga binisaya ang gamiton nga medium of instruction sa subject sa tanang tinun-an sa elementarya ug sekondarya.
Si Ricaredo Borgonia nga gikahinabi sa Banat News miingon nga ang maong lakang magkinahanglan pa kini og igong pagtuon diha sa ilang regional office.
Matud pa niini nga sa iyang bahin maayo gyud nga mapatuman ang binisaya apan samtang wala pay pormal nga sugyot nga iduso sa ilang buhatan dili pa kini hingpit nga mapatuman.
Kini tungod kay ang maong isyu mag-agi pa og taas nga proseso sa ingon matun-an ang palisiya niini nga dili usab maapektuhan ang ubang mga subject sama sa English, Mathematics, ingon man Science.
Gipadayag niini nga hayan duna gyuy pag-usab sa ubang mga curriculum, kini kun tugtan sa DepEd ang paggamit sa Cebuano nga lingguwahe.
Hinuon ang pagtudlo og binisaya sa mga tinun-an sa elementarya gikan sa grade 1 ug grade 2 napatuman na kini sa lalawigan ubos sa programa nga “Lingua Franca”.
Kahinumdoman nga gisugyot ni Mayor Adelino Sitoy sa Cordova nga gamiton ang Cebuano isip medium of instruction sa mga tunghaan.