Duha ka tawo gipamusil

Grabe ang pagkaangol sa duha ka batan-ong lalaki nga gipamusil sa miaging kaadlawon sa tulo ka wala mailhing tawo kinsa nagsakay og motorsiklo  sa  barangay Jagobiao, dakbayan sa Mandaue.

Ang mga biktima mao sila si Danilo Isoc, 19, taga Barangay Tugbongan, Consolacion ug Mark Hayag, 21,  taga Barangay Nangka sa mao gihapong lungsod.

Si SPO1 Edgar Pasaylo nga nahinabi sa Banat News mibutyag nga naglakaw lang ang duha ka biktima ug paglabay sa maong dapit kalit lang nga gipamusil.

Human sa maong insidente ang tulo ka suspetsado ang mipabulhot sa ilang gisakyang motorsiklo pahilayo sa lugar ug mipaingon kini sa lungsod sa Consolacion.

Matud ni Pasaylo nga si Isoc nakabaton og samad pinusilan sa iyang buko-buko samtang si Hayag nakaangkon kini og samad pinusilan sa dughan ug tuong bukton. Dali nga gidala ang mga biktima sa Eversely Child Sanitarium Hospital nga nahimutang duol sa maong dapit apan gibalhin usab kini sa  Vicente Sotto Memorial Medical Center sa dakbayan sa Sugbu. (Romeo T.  Limpangog)