PUJ nalimbuwad sa Pier 5

Nalimbuwad ang PUJ nga gikan sa Lapu-Lapu nga adunay mga pasahero diha sa Pier 5 ning siyudad sa Sugbu kagahapon sa udto human kini makiglumba sa lain ra usab nga PUJ.

Sumala pa ni SPO2 Nelson Jaime sa Traffic Management Group nga ang nagbangga mao ang duha ka de pasaheroang jeepney nga nagtangag sa plate no. GVX 291 ug GWP 185 diha sa Pier 5.

Apan atol ning pagsulat sa balita gibutyag ni Jaime nga ang duha ka mga drayber parehong wala motahan ngadto sa Cebu City Police Office Traffic Group gawas lang sa usa ka lisensyang nag-ila sa usa sa mga drayber nga si Jason Reyes.

Samtang usa gikatahong didto na mitahan sa Mandaue City Police Office Traffic Group. Base sa report sa DyAB kagahapon, ang usa sa mga drayber mao si Pedro Sumampong, kansang PUJ maoy giingong nalimbuwad sa dalan.

Base sa listahan sa Cebu City Medical Center giila ang mga nangalandig sa maong tambalanan nga  mao sila si Edisa Villamor, 13, Maria Villamor, 7, Amanda Martinito, 45, Renalyn Martinito, 23, Jenalyn Martinito, 19, Maria Fe Pugoy, 16, Lailadelyn Paredes, ug Stephanie Gonzaga, 18, pulos residente sa Mactan Island.

Ang walo ka mga biktima nahiagom og bun-og ug mga samad nga pangos sa ilang mga lawas maong gidali og  og dala sa mga ambulansya ngadto sa CCMC. (Julie Christy Barredo)