Pumpboat nalunod

Usa sa mga pumpboat nga niapil sa Fluvial Procession kagahapon sa buntag ang nalunod sa kadagatan sa Mandaue ug Mactan swerte hinuong naluwas ang tanang 18 ka mga pasahero niini.

Ang pumpboat nga nalunod gipanag-iya sa usa ka Tessie Santos nga taga Biasong, dakbayan sa Talisay ug pulos managparyente ang mga sakay niini.

Ang mga sea marshals sa Philippine Coast Guard  nga nagsunod sa 107 ka mga rehistradong mga sakyanan sa dagat lakip na ang MB Somewhere daling miresponde ug mikuha sa mga biktima.

Giila ni Petty Officer 3 Clark Elmer Bajenteng sa Philippine Coast Guard-Cebu Station   sa Banat News nga ang 18 ka pasaherong deboto ni Sr. Sto. Niño mao sila si Amy Santos, 20; Joyie Mendez, 31; Freston Santos, 7; Feliz Oruga,52; Wilson Santos, 28;  Wenesan Claire Santos,4; Paul Gaceres,60; Ricardo Otanda,15; Cristine Santos,11; Hermie Santos,4; Mica Santos,13; Cecily Garcia,15; Cristine Garcia Santos,14; Nikki del Rosario,14; Sheena del Rosario,11; Ronald del Rosario,41; Thea Santos,2 ug Maricar Santos,31, pulos mga taga barangay Biasong dakbayan sa Talisay.

Lima sa mga biktima lakip na ang usa ka bata ang gidala sa Pier Uno ug daling giatiman sa mga sakop sa Emergency Rescue Unit Foundation (ERUF).

Matud pa sa mga naluwas nga duna silay nadungog nga buto gikan sa luyong bahin sa ilang pumpboat ug diha-diha nagsugod na og sulod ang tubig sa dagat nga nakaingon sa ilang pagkaunlod.

Gisusi karon sa PCG ang report nga dunay kwitis nga nitugpa diha sa maong pumpboat nga maoy nakabuslot sa kasko niini.

Sa kinatibuk-an, gihulagway sa Philippine Coast Guard nga malampuson ug malinawon nga napahigayon ang fluvial procession ug gilahos pangadto sa Basilica Minore del Santo Niño pinaagi sa usa ka prosesyon.

Ang prosesyon gisugat og libuang mga debotos diha pa lang sa dalan padulong sa simbahan ug mas daghan pang debotos ang nagpaabot diha sa pilgrim center. (Uban sa report nila ni Elly Bolonos ug Romeo Limpangog)