Dakbayan sa Talisay mopadala og rescue team karong adlawa ug ang maong grupo mopahigayon sa ilang serbisyo hangtod sa adlaw’ng Domingo sa pagsaulog sa Sinulog.
Ang team leader sa Talisay Rescue Emergency Action Team (TREAT) nga si Talisay city fire marshal Felipe Canillas mibutyag kagahapon sa buntag sa Banat News nga mopahigayon sila og ayuda ngadto sa mga tawo nga nagkinahanglan og first aid atol sa nahisgutang kasaulogan.
Karong adlawa ang TREAT magsugod og pundo mga alas 6:00 sa buntag diha duol sa Basilica Del Santo Niño magdala sila og usa ka ambulansiya sa Talisay nga maoy ilang butangan sa mga kahimanan alang sa first aid.
Ug sa adlaw nga Domingo ang TREAT anha magpundo duol sa E-Mall.
Gibutyag ni Canillas nga nakadawat sila og hangyo gikan sa Office of Civil Defense nga mangayo kini og ayuda gikan sa rescue team sa Talisay atol sa pagsaulog sa pista ni Señor Santo Niño.
Ang assistant team leader nga si Talisay city health officer Dr. Lino Alanzado ang mokuyog usab sa grupo.
Karong adlawa 11 ka sakop sa TREAT ang magpahigayon sa ilang serbisyo ug 11 usab ang mo-duty karong Domingo.
Matud ni Canillas nga adunay mga nurse usab ang magpundo uban kanila aron makahatag usab og ayuda.
Ang TREAT natukod kini niadtong Oktubre, 2005 ug gilangkuban kini sa 15 ka mga miyembro nga mga sakop sa Local Government Unit (LGU) sa siyudad.
Apan niadtong buwan sa Nobiyembre sa milabay’ng tuig mipasar og resolusyon ang tsirman sa TREAT nga si Konsehal Sabeniano Abatayo aron sa pag-aktibo sa rescue team.