Kapolisan sa Lapu-Lapu alerto alang sa Sinulog

Alerto karon ang kapolisan sa dakbayan sa Lapu-Lapu gumikan sa daghang mga langyaw nga miabot sa siyudad tungod sa nagsingabot nga Sinulog sa dakbayan sa Sugbu.

Matud pa ni Police Superintendent Louie Oppus ang Director sa Lapu-Lapu Police Office nga nahinabi sa Banat News   nga base sa ilang pagmonitor daghan  na sa mga langyaw ang anaa na karon sa mga hotel ug mga resort sa dakbayan.

Gumikan sa maong kalamboan gimandoan ni Oppus ang iyang mga sakop sa hugot nga pagmonitor sa mga bisita ug igong proteksiyon alang sa hapsay ug luwas ug malikay sa kakuyaw ang mga turista sa ilang pagbakasyon sa Sugbu.

Hinuon wala pa sila makadawat og taho nga dunay mga dautang elemento nga anaa karon sa dakbayan sa Lapu-Lapu nga motisok og kasamok atol sa Sinulog grand mardigrass.

Si Oppus miawhag sa katawhan sa dakbayan sa Lapu-Lapu lakip na ang mga barangay officials ug mga tanods niini sa pagtaho ngadto kanila kung adunay tawo nga katahapan og lihok sa ilang mga dapit aron marespondehan dayon kini sa mga sakop sa kapolisan ug masukit-sukit sa ilang katuyoan dinhi sa Sugbu.

Kahinumduman nga sa milabay'ng tuig atol sa pagpahigayon sa Sinulog 2007 hapsay ang kahimtang sa mga langyaw nga nagtikaw-tikaw sa kagabhion sa dakbayan sa Lapu-Lapu kini gumikan sa ilang hugot nga siguridad nga gihatag ngadto sa mga langyaw.