Lalaki gibunalan sa kapuyo

Nakaangkon og samad sa agtang ug tuong apapangig ang usa ka 20-anyos nga lalaki human kini bunali og botilya sa iyang kapuyo niadtong Martes sa gabii diha sa Barangay Dumlog, dakbayan sa Talisay.

Ang biktima mao si Rene Maneja, residente sa maong lugar ang daling gidala sa Talisay District Hospital.

Ang suspetsado mao si Catherine Dabun, 26, kapuyo ni Maneja.

Si Maneja ug ang kapuyo niini aduna nay duha ka anak.

Si Erlinda, inahan ni Maneja sa pakighinabi niini sa Banat News kagahapon sa buntag mibutyag nga mahitungod sa kwarta ang giawayan sa duha.

Matud ni Erlinda nga ang iyang anak manghakutay kini og balas diha sa sapa ug nasweldohan kini og sobra sa P500 ug ang maong kwarta gipagunitan sa biktima ngadto sa iyang kapuyo.

Apan dihang gikuha ni Maneja gikan ni Catherine ang maong kwarta tungod kay gusto niining ipalit og mga kahoy alang sa tukoron nilang balay gikatahong nasuko na si Catherine.

Si Erlinda mipasangil nga ang nahisgutang kwarta gisugal ni Catherine nga maoy hinungdan sa ilang away ni Maneja.

Gibutyag ni Erlinda nga ang maong insidente nahitabo diha sa sugalan diin si Catherine nanugal.

Nahitabo ang panaglalis sa duha nga maoy hinungdan nga si Catherine mipunit og botelya ug gihapak ngadto sa agtang ni Maneja apan nasumbagan usab sa biktima ang suspetsado sa kilid.

Apan mipunit og laing botelya si Catherine ug gihapos na usab ngadto kang Maneja ug maayong pagkaigo sa tuong apapangig sa biktima.

Si Catherine ang gidala ni Konsehal Dennis Basillote diha sa police station sa Barangay Poblacion human sa maong hitabo.

Si Catherine sa pakighinabi niini   Banat News miangkon kini sa nga iyang nabunalan og botelya ang iyang kapuyo tungod kay gipakauwawan siya niini.

Si Erlinda mibahad nga mopasaka siya og kaso batok ni Catherine.