Bayan Muna ok ibasura ang pork barrel

Gikalipay sa mga sakop sa militanting pundok dinhi sa Sugbu ang laraw sa ubang mga kongresista sa nasud nga nagtinguhang makunhoran ang pundo sa ilang mga pork barrel.

Si Arman Perez,  secretary general sa Bayan Muna Central Visayas, nga gikahinabi sa Banat News miingon nga ilang gihangop sa grupo ang giduso ni  Kongresista Lorenzo Tañada lll sa Quezon City nga  nag-awhag sa iyang mga kauban nga ang P70 milyones nga pork barrel matag tuig himuon na lang kini nga P40 milyones.

Kini aron makahatag usab og abag sa gobiyerno subay ning lakang nga pagdaginot gumikan ning krisis sa lana nga gipatuman diin gitinguhang kunhuranan ang 12 porsiyento nga expanded value added tax.

Alang kaniya nga ang maong isyu maoy haum karon nga mga panahuna ug gani kun mahimo ibasura nalang sa hingpit ang pagdawat sa mga kongresista sa pork barrel.

Sumala pa ni Tañada nga niadto pang 13th Congress sila nga nagtinguhang mabasura gyud ang pork barrel tungod kay klaro usab kaayo ang pagpang-hostage sa goberno sa mga kongresista sa ilang mga desisyon.