Barcenas supak sa federalism ni Pimentel

Supak ang kanhi presidente sa Integrated Bar of the Philippines (IBP) Cebu City Chapter Atty. Democrito Barcenas sa lakang ni Senate minority floor leader Aquilino Pimentel nga moduso sa Senado sa Presidential Federal Form of Government dinhi sa nasud.

Si Barcenas nga gikahinabi sa Banat News mipadayag nga ang lakang ni   Pimentel sama lang sa nagtukob sa paon nga giduso ni Presidente Gloria Macapagal Arroyo nga maamendar ang Batakang Balaod ug makapadayon sa ilang gahum lagpas sa 2010.

Si Barcenas mipasabot nga ang iyang kaugalingong opinion iya unya kining ipadangat sa IBP-Board atol sa ilang tigom nga pagsupak sa lakang ni Pimentel.

Alang kaniya mas pabor siya nga mapadayon ang  kasamtangang  form of  government dinhi sa nasud kay sa federal form of government kini tungod kay pipila lang ka lugar dinhi sa Pilipinas ang makabarog kun federal form.

Matud pa niini nga dili sama ang Pilipinas sa ubang estado  sa Uropa, Amerika, ug Australia nga makabarog sa kaugalingon  tungod kay ang nasud ang Metro Manila lang ingon man Central Visayas dinhi sa Sugbu maoy makabarog sa kaugalingon ug ang uban mga kabus nga probinsya.

Gawas pa niini nga ang mga ‘local warlord’ kinsa nagka-upos na unta karong mga panahuna mosamot sa pagpadayon sa ilang pangabuso kini kun ma federal ang Pilipinas.

Nunot niini, mas maayong magpabilin ang unitary form of government ug centralized ang goberno sa nasud, ug ang mas makaayong amendahon ang Republic Act R.A. 9160 nga nailang local Government Code of 1991.

Sumala pa niini nga angayang amendahon ang maong balaod nga mahatagan pa og mas taas nga gahum ang mga local government units sa pag-exercise sa ilang gahum sa  panggobiyerno.