Informant vs 3 ka killer sa polis may ganti gikan sa CH

Gipaabot nga makadawat og ganting salapi gikan sa kagamhanan sa dakbayan sa Mandaue ang informant ug ingon man ang mga polis nga nakasikop sa tulo ka tulisan nga suspetsado sa pagpusil patay kang SPO1 Pedro Sucion ug miangol kang PO2  Darius Conejos.

Si SPO2 Arturo Manaling Jr. sa Investigation Bureau and Management Group (IBMG) sa Mandaue City Police Office (MCPO) nga nahinabi sa Banat News miingon nga nagmalampuson sila sa pagsikop sa tulo ka suspetsado tungod usab sa pagtabang sa mga tawo.

Unang nadakpan sila si Lauro Lumapas alyas Jogro ug Jonathan Samson sa gitagoang panimalay sa barangay Imus, dakbayan sa Sugbu ug nagsunod usab si Leo dela Victoria nga ilang nadakpan sa usa ka panimalay sa dakbayan sa Talisay.

Ang duha nga sila si Lumapas ug dela Victoria  nagtingkagol karon sa Mandaue City Jail ug gitanggong usab sa Bagong Buhay and Rehabilitation Center (BBRC) sa dakbayan sa Sugbu ang ikatulong suspetsado nga si Samson.

Dugang pa ni SPO2 Manaling nga giila sa mga nakasaksi sa maong insidente ang mga suspetsado ug ang kasayuran sa gitagoan sa tulo ilang nahipos gikan sa ilang informant nga maoy naggiya sa ilang operasyon hangtod nga ilang nadakpan ang tulo ka suspetsado.

Si Bise Mayor Carlo Fortuna nga nahinabi sa Banat News miingon nga ang informant  ilang hatagan og ganti.

Si Majority Floor Leader Victor Biano ang nakapalabang na og resolusyon alang sa paghatag usab og P3,000 sa kapolisan isip ganti sa dinaliang pagkasikop sa tulo ka tulisan.