Testigo gihulga sa nag-helmet

Testigo sa pagpatay sa kanhi mayor  niadtong bulan sa Mayo gihulgang patyon sa duha ka mga lalaking nag-helmet ug nagsakay og motorsiklo diha sa Banawa St. sa barangay Guadalupe ning dakbayan.

Misumbong sa buhatan sa Homicide Section ang testigong taxi driver nga residente gihapon dinhi sa Sugbu kinsa naa ilawom sa proteksyon sa Cebu City Police Office human babagi sa nagmotor niadtong Enero 10.

Matud pa sa biktima ngadto sa kapolisan kasamtangan siyang nagmaneho sa iyang motorsiklo dihang pag-abot niya sa maong lugar kalit siyang gibabagan sa maong mga tawo ug ang duha mikanaog apan wala maghubo sa ilang mga crash helmets.

Ang maong testigo (ngan gipugngan tungod sa seguridad) maoy usa sa mga saksi  dihang gipusil patay si  Sta. Fe ex-mayor Roger Illustrisimo niadtong Mayo 2 pipila nalang ka adlaw sa eleksyon, diha mismo sa atubangan sa pultahan sa provincial Comelec.

Dihang nitahan si kanhi PO1 Arnulfo Pigon,Jr. sa National Bureau of Investigation sa Manila ug gidala dinhi sa dakbayan positibo kining giila sa maong testigo nga maoy gunman sa mayor.

Hinuon si Pigon kusganong mihimakak sa maong mga pasangil dihang gipangutana sa media ug nangangkong didto ra siya sa Manila atol sa pagkahitabo.

Apan gumikan sa iyang pagbarog sa kung unsay iyang nakita gituuhang dunay tinguha sa kinabuhi niini maong gibutang kini sa proteksyon sa kapolisan.

Gikatahong ang usa sa duha ka wala mailhing mga lalaki gikatahong mibahad kaniya sa pag-ingon og “Maihap nalang imong adlaw, patyon ka namo.”

Ang maong mga lalaki yanong mibalik sa ilang motorsiklong walay plate number ug daling misutoy padulong sa barangay Capitol Site samtang siya midangop dayon ngadto sa kapolisan.