Round up sa Tejero, 14 nasikop

Katorse ka mga tawo ang gidakop samtang mga armas, shabu ug video karera ang  nasakmit sa mga sakop sa Criminal Investigation and Intelligence Branch sa Cebu City Police Office diha sa barangay Tejero niadtong milabay'ng gabii.

Ang pag-round up sa mga tawo may labot sa anti-criminality campaign sa kapolisan diha sa maong dapit nga giingong gihugpaan og mga iligal nga kalihukan.

Ang CIIB ug Special Weapons and Tactics mironda sa maong dapit pinanguluhan nila ni Supt. Pablo Labra, Chief Insp. Arnel Banzon ug Sr. Insp. George Ylanan midakop usab sa tulo ka bata ug pito ka mga kalalakin-an.

Ang tulo ka bata gipabuhian ug giturn-over ngadto sa ilang ginikanan dala ang pahimangno samtang ang pito ka mga hamtong nga lalaki gikuhaan og mga hulagway ug records tungod kay walay nakuhang ebidensya batok kanila gawas lang nga kadudahan ang ilang pag-anha sa maong dapit nga lawom na ang kagabhion.

Atol sa maong operasyon, duha ka mga lalaki ang nadakpang nagdala og tagsa ka .38 kalibre rebolber nga pulos puno og bala. Giila ang duha mao sila si Oliver Vargas ug Roel Gingoyon, wala sila makapakita og lisensya sa paghupot niini.

Si Gingoyon gikatahong namay-ungan sa usa sa mga sakop sa CIIB nga maoy misuway  og pusil kaniya pipila na ka bulan ang nakalabay atol sa usa ka anti-illegal drugs operation diha sa maong dapit samtang kini giposasan apan gitapuk-an sa mga tawo ang mga polis ug may usa kanila ang mitunol og pistola hinungdan nga kini nakaeskapo.

Samtang nasikop usab si Eric Manso dihang nakuhaan og icepick. Nasikop usab ang usa ka Herodes dela Cruz human kini makuhai og lima ka medium size packs ug usa ka dakong paketeng gidudahang shabu.

Laing napulo usab ka tawo ang nasikop nga namusta og moli-moli sa usa ka panimalay ug giilang sila si Gerry Gallway, nga giingong caretaker sa maong mga makina. Pablo Siclot, Ronilo Tabaco, Ricky Delarmente, Ares Loberanes, Allan Rivera ug Ernesto Balansar nga pulos taga Mandaue.

Nadakpan usab sila si Jay Ruiz, Jonnel Ruiz, pulos taga barangay Mabolo ug Joven Orbiso nga residente sa maong dapit.

Gisakmit dayon sa kapolisan ang duha ka moli-moli ug duha usab ka video karera nga giingong maoy ilang gipustahan.