Babaye kaduha gi-hit and run sa M’daue patay

Patay ang usa ka babaye kinsa nadasmagan  sa duha ka sakyanan nga mi-hit and run  alas 8 pasado ang takna sa miaging gabii sa dalan Plaridel, barangay Umapad, dakbayan sa Mandaue.

Si SPO3 Eleazar Saromines, imbestigador sa traffic section sa Mandaue City Police Office (MCPO) miila sa namatay nga  si Cristina Mendoza Iwa, minyo, 50 anyos ug nagpuyo sa maong dapit.

Matud pa ni Saromines nga milabang ang biktima paingon sa atbang nga bahin sa karsada sa maong dapit ug ang naghaguros nga awto nga gimaneho sa wala hiilhing drayber ang kalit lang midasmag niini.

Nalagpot ang biktima sa taliwala sa karsada ug nalatayan kini sa nagsunod nga laing sakyanan nga kusog usab nga nagdagan nga maoy nakaingon sa grabeng kadaut sa kalawasan sa biktima,

Si SPO3 Saromines miingon nga wala manumbaling ang mga drayber sa sakyanan nga nakadasmag sa biktima sanglit pulos man kini mipadayon sa pagpabulhot sa ilang mga sakyanan pahilayo sa maong lugar.

Dugang pa ni Saromines nga ang mga residente sa maong dapit nga nakalitan sa maong hitabo ang wala usab makamatikod sa mga plate number sa maong mga sakyanan sanglit dali kining nakapahilayo sa maong lugar.  

Ang mga sakop sa Accident Control and Emergency Rescue Team (ACERT) sa maong dakbayan nga nahidangat sa maong lugar ang dali nga midala sa biktima sa Mandaue City District Hospital apan gideklarar kining dead on arrival.