BMW Motor Sales 'Gironda' sa Pasg

Gironda sa mga sakop sa Presidential Anti-Smuggling Group (PASG-7) ang service center human makadawat og intelligence report nga adunay naabot kanila nga mga BMW nga sakyanan nga giingong smuggled.

Ang mga operatiba sa PASG nga gipanguluhan sa deputy director nga si Ricardo Collantes miinspeksiyon kagahapon sa hapon sa 25 ka nagkalainlaing mga BMW nga gipa-repair sa mga tag-iya niini sa service center BMW Motor Sales nga nahimutang sa Nivel Hills, barangay Apas.

Si Collantes mitug-an nga nakadawat sila og intelligence report nga adunay mga smuggled nga BMW sa Sugbo nga gidala sa service center niini sa Nivel Hills aron ipa-repair.

Gikuhaan sa grupo ni Collantes og mga rekord ang maong mga sakyanan pinaagi sa service booklets sa mga sakyanan ug sa mga plate number niini.

Pinaagi sa plate number, sumala pa ni Collantes, i-verify nila ang rekord sa maong mga sakyanan ngadto sa Land Transportation Office.

Si Collantes, sa dihang nahinabi sa Banat News, nagkanayon nga mismo ang tagdumala sa BMW Motor Sales ang mireklamo ngadto sa PASG tungod sa mga sakyanan nga nangabot kanila nga nagdala og mga service booklet nga nakatala nga naggikan kini sa Japan.

Ang report nagkanayon nga daghang mga smuggled nga mga sakyanan nga nangabot dinhi sa Sugbo nga gikan sa Japan, diin ang mga right-hand drive didto gi-convert ngadto sa left-hand drive pag-abot dinhi sa Sugbo.

Ang maong 25 ka mga sakyanan i-hold una samtang imbestigahon pa nila ang nanag-iya niini pinaagi sa makuha nilang registration record sa LTO.

Apan si Collantes nagkanayon mahimong i-release balik ngadto sa mga tag-iya ang maong mga BMW samtang nagpadayon ang ilang “verification process” sa LTO.

Giklaro niya nga kun masakpan nilang smuggled ang maong mga sakyanan ug wala makabayad sa hustong duties and taxes, ilang sakmiton ang sakyanan. Kini kun dili motuman sa ila unyang direktiba pagpa-ubos sa voluntary disclosure program sa Bureau of Customs diin pabayron lamang sila og dugang buhis sa maong mga sakyanan.

Matud pa ni Collantes nga mapasalamaton hinuon siya sa mga tagdumala sa BMW Motor Sales nga mikooperar sa ilang pag-inspeksiyon.

“Siyempre, we have to cooperate because we are one of the complainants (against car smuggling),” si Arden Godinez, ang manager sa BMW-Nivel Hills.

Gikonpirmar ni Godinez nga sila ang mihangyo sa PASG pag-verify sa mga sakyanan nga naserbisyohan nila tungod sa report nga mga smuggled kini.

Si Godinez miingon nga patakaran sa BMW service center ang pagdawat lamang og mga sakyanan nga ilang binaligya ug binaligya sa ilang branch didto sa Manila.

Apan nahibulong sila sa dihang adunay mga service booklet sa kada sakyanan nga BMW nga magpa-repair o magpa-service nila nga adunay rekord nga naggikan sa Japan.

Si PASG-7 Director Ariel Palcuto mimando ngadto sa iyang mga operatiba nga gipanguluhan ni Collantes sa pagpangayo sa panabang sa mga tagdumala sa BMW pagpatuman sa nakalatid sa E.O. 624 ilabi na ang pag-imbestigar sa mga imported BMW nga ilang giserbisyohan dili ba mga smuggled.

Sa mando ni Palcuto nga gipetsahan og Enero 9, 2008, kini nagkanayon nga ipatuman usab nila unsay nakalatid sa Tariff and Customs Code batok sa maong mga sakyanan.