Mga polis sa MCPO ipaubos sa gun safety training

Ang mga polis sa Mandaue City Police Office (MCPO) nga gipaubos sa tulo ka adlaw nga refresher training ang ipaubos usab sa gun safety and gun proficiency  training.

Si Acting Director Senior Superintendenat Rodel Calungsod nga nahinabi sa Banat News ang mipadayag niini kagahapon.

Ang mga sakop sa Special Weapon and Tactic (SWAT) sa kapolisan sa MCPO maoy nagdumala sa mga training seminar sa kapolisan sa dakbayan.

Matud pa niya nga gibahig sa duha ka grupo ang mga polis sa matag presinto nga maoy mitambong sa refresher training ug mao usab ang pagahimoon sa gun safety and proficiency training.

Gitataw ni Calungsod nga kini iyang gihimo aron ang mga polis kanunay mapahinumduman sa angay nilang pagahimoon sa pagtubag og alarma aron kalikayan ang nasinati ni SPO1 Pedro Sucion ug PO2 Darius Conejos.

Dugang pa niya nga ang gun safety ug gun proficiency training ang posible nga malangan lamang sa pagpahigayon sanglit nagkinahanglan man kini og mga bala.

Hinuon si Chief Superintendent Ronald Roderos kinsa mipadayag og pag-uyon sa iyang gihimo nga pagpaubos sa refresher seminar sa mga polis ang mipadayag usab sa paghatag og suplay nga bala.

Si Calungsod miingon nga ang pagbansay sa paggamit sa armas ang angay gyud nga pagahimoon sa matag tuig aron kanunay nga lab-as sa panumduman sa kapolisan ang ilang nakat-onan sa mga training.