DepEd padayon sa kampaniya batok dengue

Padayon ang kampaniya sa anti-dengue program sa Department of Education (DepEd) sa lalawigan sa Sugbo karong tuig 2008 sa tanang mga eskwelahan sa elementarya ug segundarya.

Si Cebu Provincial DepEd Supervisor Ricaredo Borgonia nga gikahinabi sa Banat News nagkanayon nga ilang gipalapdan ang kampaniya batok sa dengue karong tuiga sugod sa pagsulod sa buwan sa Enero.

Matud pa niini nga ang ilang mga health personnel sa DepEd  nagpadayon karon sa pag-monitor sa mga eskwelahan sa elementarya ug segundarya sa lalawigan kini aron pagsuta kun wala bay nabiktimang estudyante sa sakit nga dengue.

Iyang giklaro nga ang mga health personnel sa DepEd giabagan kini sa mga lokal nga health personnel sa kabarangayan ug kalungsoran kini aron mapadayon ang program of dissemination.

Sumala pa niini nga ang pagtamod lang gyud sa insaktong paagi sama sa pagpanglimpiyo sa mga suok nga lugar sa eskwelahan, pagbalik-balik sa pagpahimangno sa mga ginikanan ug kabataan nga limpiyohan ang ilang mga balay ug kadtong mga butang nga posibleng mapundohan og tubig malabay.

Hinoon niining mga panahona sukad sa pagsulod sa buwan sa Enero wala pay mga taho nga nadawat sa iyang buhatan nga adunay mga eskwelahan o kaha mga estudyante nga nabiktima sa dengue.Nunot niini ang ilang programa nga anti-dengue kanunay gyud kining ipatuman ug ibalik-balik sa pagpadayag sa mga magtutudlo ngadto sa ilang mga istudyante.