Laing suspek mitahan

Ang laing suspek sa pagpatay kang SPO1 Pedro Sucion ug pagkaangol kang PO2 Darius Conejos sa Mandaue nga si Niño Macasero mitahan kagahapon sa iyang kaugalingon sa komentaristang si Bobby Nalzaro didto sa lungsod sa Alcantara.

Si Nalzaro mituyo og adto sa Alcantara uban sa pipila niya ka reporter human ang uyoan ni Macasero mituyo og adto sa studio sa GMA-7 sa Busay aron tug-anan ang komentarista sa intensiyon sa suspetsado nga motahan ngadto sa mga awtoridad pinaagi niya.

Wala hinuon mausik ang panahon nga gigahin ni Nalzaro tungod kay mitahan gyud ngadto kaniya si Macasero.

Sakay sa service vehicle sa GMA-7, si Macasero gidala dinhi sa Sugbo ni Nalzaro.

Sa pag-abot dinhi sa Sugbo, gideretso sa pagdala ngadto sa Mandaue City Police Office si Macasero ug gi-turnover ngadto ni MCPO acting director Sr. Supt. Rodel Calungsod.

Si Macasero miangkon nga nagkaila sila sa laing duha ka suspek sa pagpatay kang SPO1 Sucion ug pag-angol kang PO2 Conejos, nga sila si Lauro Lumapas alyas Jogro ug Leo dela Victoria.

Giangkon usab niya nga didto siya atol sa pagpanulis, apan matud pa niya nga wala siyay kalibutan nga manulis ba diay silang Lumapas ug si dela Victoria.

Sumala pa niya nga naghukdong lamang siya sa taxi sa dihang nanulis ang duha niya ka kauban. Dugang pa niya nga sa pagyahat niya gikan naghukdong, mao nay iyang nakit-an nga nagtion na silang Lumapas ug dela Victoria sa drayber.

Apan matud niya nga tungod sa iyang nakita, nakurat siya hinungdan nga mikaratel siya og dagan  ug wala na mopakita pa sa iyang mga kaubanan.

Gipahibalo kagahapon sa kapolisan sa Mandaue nga gipasaka na kagahapon ang kasong robbery, murder ug frustrated murder batok nilang Lumapas, Macasero ug dela Victoria.

Si Lumapas nasikop niadtong miaging adlaw sa luyong bahin sa Department of Education sa Imus road, barangay Sikatuna.

Nakuha kaniya ang duha ka kalibre .38 nga rebolber nga gipailawoman sa iyang unlan.

Pabiling gawasnon si dela Victoria. Ang kapolisan sa Mandaue padayon sa ilang paggukod sa suspetsado.

Silang Lumapas, Macasero ug dela Victoria maoy gikatahong nanulis sa usa ka taxi driver sa dihang miresponde silang SPO1 Sucion ug PO2 Conejos sakay sa usa ka motorsiklo.

Sa dihang gisitar sa duha ka polis ang tulo ka tawo nga sakay sa usa ka traysikol, kalit lamang gipusil sa usa sa tulo ka suspetsado silang SPO1 Sucion ug PO2 Conejos.

Naigo si SPO1 Sucion sa iyang tangkugo ug gikatahong gitiwasan pa human gipatiran.