Bug-at nga silot vs mga malaw-ay'ng buhat

Giduso na ni Cebu City South District Congressman Antonio Cuenco ang balaudnon nga magpahamtang og mas bug-at nga silot niadtong makahimo og eskandalosong buhat nga mag-promote og  imoralidad.

Ang House Bill 2856 sa kongresista magpahamtang  og P100 mil ngadto sa P2 milyones nga multa batok sa mga tawo nga makahimo og salawayong buhat sa tuyo nga mamenusan kun dili man hingpit mawagtang ang malaw-ay ug imoral nga kalihukan.

Alang sa kongresista ang kasamtangang balaud gipakagaan lang sa mga malapason   tungod usab sa kagamay sa multa.

Giklaro ni Cuenco nga ang gitawag og grave scandal, indecency, pornography ug ubang salawayong mga buhat, seryosong kalapasan ug nakahatag og kadaut ilabi na ngadto sa mga biktima niini.

Nasayran nga ang kalapasan sa decency ug good customs mahimong masilutan ubos sa Akta Republika 3815 kon ang Revised Penal Code, apan tungod sa kadugay na sa maong balaud miingon si Cuenco nga kini kinahanglan nang maamendar. (Elly Bolonos)