Batang naghikog mabdos?

Gituohan sa kapolisan nga mabdos ang 14 anyos nga batang babaye nga naghikog niadtong  Bag-ong Tuig diha sa Caduwawan lungsod sa Tabogon.

Apan ang hepe sa Provincial Investigation and Detective Management Branch (PIDMB) Supt. Teofilo Siclot mitug-an sa mga tigbalita kagahapon ang uterus sa 14  anyos nga bata gikuha sa mga taga Scene of the Crime Operatives (SOCO) aron ipaubos sa eksaminasyon  aron maditerminar kung mabdos ba gyud  kini.

Kun kahinumduman niadtong Enero uno sa hapon  ang dalagita naghikog pinaagi sa paghikot og habol sa liog diha sa payag nga gipanag-iya ni Florendo Quinain kinsa maoy nagpatungha kaniya sa elementarya.

Matud ni Siclot base sa resulta sa awtopsiya sa taga SOCO nasuta nga hikog gyud ang namatyan ni Hazel ug walay foul play ang iyang kamatayon.

Apan gitug-an ni Siclot nga dili na putli ang maong bata hinuon dili sila makatumbok kung bag-o pa kining nahilabtan.

Dugang pang Siclot nga dunay hinigugma ang maong bata ug mao kini karon ang ilang gipangita aron ilang mapaubos sa imbestigasyon.

Ang maestro ni Hazel  mitug-an kang Siclot nga pirming  tulala ug "uncooperative" ang bata sa wala pa ang bakasyon sa klase niadtong Disyembre.