Ipahunong sa Aids Free Philippines (AFP), Human Life International (HLI) ug sa Catholic Bishop Conference of the Philippines (CBCP) ang mga TV commercials labot sa mga contraceptives.
Partikular nga gitombok sa chairman sa AFP nga si Doctor Rene Josef Bullecer, mao ang giingong kanunay nga gibalik-balik nga pahinumdum sa telebisyon nga nag-awhag sa mga viewers paggamit og pills ingon man sa condom.
Niingon si Bullecer nga ang AFP, HLI ug CBCP muduso sa ilang reklamo ngadto sa Advertising Board (Adboard), Kapisanan ng mga Brodkaster sa Pilipinas (KBP) ug sa Movie Television Review and Classification Board (MTRCB) karong adlawa.
“Mopadangat gyud mi og pormal nga reklamo karong adlawa kay dili mahimo nga ipadayon na pagpasalida, it’s very immoral, uncalled for, nganong ila nang gipasalida nga makadaut man na sa moralidad sa katawhan ug sa sosyidad,”sumala pa ni Bullecer.
Subay niini, nanawagan si Bullecer sa katawhan ilabi na sa mga ginikanan nga musuporta sa ilang lakang aron mapabilin ang giampingan nga moralidad sa katawhang Pilipino isip bugtong kristiyano nga nasod sa Asya.
Nagkanayon si Bullecer nga kung dili paminawon sa hingtungdang mga buhatan ug sa TV station ang ilang isang-at nga reklamo, sila mapugos pagpasaka og class suit ngadto sa hukmanan.