Reporter gihulgang "ligsan" sa konsehal

Si Konsehal Dennis Basilotte sa dakbayan sa Talisay  gipasanginlang nanghulga sa reporter sa Sun Star Daily Superbalita nga si Vincie Monterde.

Kagahapon sa buntag si Monterde kinsa presidente usab sa Talisay City Reporters Organization (TCRO) nagpa-blotter diha sa kapolisan sa Barangay Poblacion batok ni Basilotte.

Si Monterde sa pakighinabi niini kagahapon sa mga tigbalita mibutyag nga ang mga konsehal nga kauban ni Basillote ang misulti ngadto kaniya kabahin sa giingong pagpanghulga.

Niadtong Huwebes sa buntag ang mga majority nga sakop sa konseho sa siyudad uban ni Mayor Socrates Fernandez mipahigayon og meeting diha sa conference room sa buhatan sa mayor.

Gikataho nga atol sa maong meeting adunay mga bangi nga gihusay ang grupo tali nila ni Basillote ug Talisay city administrator Richel Bacaltos apan matud ni Monterde nga wala siya makahibalo kung unsay panagbangi sa duha ug atol sa maong meeting wala usab diha si Monterde.

Nahibaw-an ni Monterde gikan sa usa ka konsehal nga atol sa meeting gikatahong medyo init ang  gipanulti ni Basillote ug nagkanayon ang maong konsehal nga “napay Vincie pakit-on ta mo kung unsaon ko na siya sa pagtamparos” ang maong mga pulong gikataho nga gibuhian ni Basillote atubangan sa iyang mga kaubang konsehal ug sa mayor.

Gikataho nga mibutyag si Basillote nga wala pa mahuman ang ilang bangi ni Vincie sulod na sa upat ka tuig.

Si Monterde mipasangil usab nga human sa maong bug-at nga mga pulong si Basillote gikataho usab nga misulti sa usa sa kauban niya nga konsehal nga nagkanayon “makit-an ko gani na siya sa karsada (Vincie) ligsan ko na siya”.

Human sa maong meeting usa sa mga konsehal ang daling mipahibawo ni Monterde ug mipasidaan nga dili siya pakompiyansaon ni Basillote kay mibahad kini og dili maayo batok kaniya.

Matud ni Monterde nga wala siya’y labot sa meeting ug nahibulong siya nganong giapil siya ni Basillote.

Nahinumduman ni Monterde ang iyang nasuwat nga balita sa eleksiyon niadtong tuig 2004 kinsa si Basillote midagan isip bise mayor sa dakbayan batok ni kanhi Bise Mayor Aberdovey Belleza apan si Basillote napilde ni Belleza.

Si Monterde nagkanayon nga aduna siya’y na “quote” sa iyang gisuwat nga “ang Talisay adunay 22 ra ka barangay, unya dunay ika-23 nga mao ang Comelec” apan matud ni Monterde si Basillote ang misulti niini ug gani nakadungog ang mga kapitan ug si Konsehal Alan Bucao sa maong gisulti niadto ni Basillote.

“Wala ko kahibalo kung mao ba diay na ang iyang gikasuk-an nako, ug kung tarong pa siya iya unta kong gi-confront,” ni Vincie pa.

Sa laing bahin, si Basillote sa pakighinabi niini sa Banat News kagahapon mihimakak   sa maong pasangil ug mihagit ni Monterde nga kung aduna kini ebidensiya moduso kini og kaso batok kaniya.

Si Monterde sa kataposang pamahayag niini kagahapon mibahad nga ikunsulta niya sa iyang abogado ang  gibuhat ni Basillote ug posibleng iduso niya ang maong kaso ngadto sa Ombudsman.

Ang konsehal mipasangil nga ang maong hitabo posibleng pamolitika ug adunay mga kauban niya sa konseho nga wala kauyon niya.

Si Basillote nangangkon nga  wala siya’y  nahinumdumang bikil nila ni Monterde apan mipasangil kini ngadto ni Monterde nga lakip sa payroll sa city hall sa siyudad tungod kay sakop kini sa traffic commission.

Ug kung aduna pa siya’y kasuko iyaha nang gituki si Vincie kabahin sa pagkaapil niini sa payroll sa city hall, ni Basillote pa.