Kargador gidul-itan og pusil, patay

Patay ang usa ka kargador kinsa gidul-itan og pusil sa nawong ug sa dughan diha sa Unit II sa Carbon Market sa barangay Ermita ning dakbayan niadtong milabay'ng gabii.

Ang namatay giilang si Genciano “Dodong” Montalba, 30, lumad nga taga Zamboanga del Norte ug kasamtangang nagpuyo diha sa maong merkado.

Sa imbestigasyon ni SPO2 Jay Yballe sa Homicide Section sa wala pa makit-ing patay diha sa maong dapit ang biktima nakadungog ang mga tawo og duha ka sunod nga buto sa pusil.

Dihang ilang gisusi ang dapit nakit-an nalang ang biktima nga nagbuy-od ug wala nay kinabuhi. May pinusilan sa iyang walang aping ug sa dughan si Montalba.

Sumala pa sa kapolisan base sa gitug-an sa igsuon ni Montalba nga si Gerry, sayo pa niana nag-inom sila sa biktima uban sa mga kargador usab nga sila si Nelson Largo, Ringo Jumaos ug Dindin.

Matud pa ni Gerry nga  si Largo niadtong tungura dunay gidala-dalang usa ka kalibre 38 rebolber. Si Largo gikatahong dugay  na nga may pagdumot   kang Gerry ug sa biktima tungod usab sa ilang panagbangi kabahin sa ilang pagpangarga diha sa maong merkado.

Walay nakitang basiyo o ba kaha slugs ang kapolisan diha sa crime scene.

Sumala pa sa mga polis nga mihiling sa patay'ng lawas niini dunay tattoing diha sa nawong sa biktima duol sa samad pinusilan. Ang tattoing sagad makita sa mga samad pinusilan nga gidul-itan pagpusil.