Usa ang namatay sa duha ka minor de edad nga mga lalaki nga nakuryentihan human makahikap sa main line sa Mactan Electric Company (MECO) gahapon sa buntag sa sitio Basak Mercado sa barangay Basak, dakbayan sa Lapulapu.
Ang namatay mao si Leonard Inso, 16 anyos ug ang nakabaton grabeng paso sa kalawasan ug naa sa Lapulapu District Hospital mao si Randel Tampus, 15 anyos ug padayon pa nga giatiman sa mga doktor.
Si Senior Inspector Francisco Baguio, hepe sa homicide section sa kapolisan sa maong dakbayan nga nahinabi sa Banat News miingon nga si Randel gisugo sa iyang amahan sa pagkuha sa kawo nga nahibilin sa gitukod nga building nga nahimutang sa maong dapit.
Nagkuyog ang manag-agaw sa pag-adto sa maong building apan dihang didto na sila sa maong dapit kalit lang nga nakahikap og live wire sa MECO.
Dugang pa ni Baguio nga ang mga silingan nga nakamatikod sa maong hitabo dali nga miugkat sa mga biktima ug gidala sa Mactan Doctors Hospital diha sa duol apan dead on arrival si Inso.
Si Senior Inspector Baguio miingon nga nagpadayon pa karon ang ilang imbestigasyon alang sa pagsuta kun kinsa ang ilang pasakaan og kaso, ang tag-iya ba sa gitukod nga building o ang kompaniya ba sa MECO nga maoy tag-iya sa kuryente.