Drayber misukol sa 2 ka tulisan

Misukol sa duha ka armadong tulisan ang taxi driver sayo sa gabii sa Bag-ong Tuig nga  nalandig sa tambalanan human makabaton og samad dinunggaban sa liog ug bukton apan usa sa mga tulisan ang nadakpan.

Ang biktima mao si Alberto Canono, 28, minyo nga taga Pagsabungan, dakbayan sa Mandaue ug drayber sa AB Taxi nga nagdala sa plate number  GWG 644.

Si SPO2 Nicanor Bacayo nga nahinabi sa Banat News miila usab sa nadakpan nga si Joven Castro, 22,  taga Basak, dakbayan sa Mandaue.

Giila usab niya ang nakaikyas nga kauban ni Castro nga mao ang usa ka Raniel Casilagan nga walay permanenteng pinuy-anan kinsa gikaingong maoy nakadala sa P1,600 nga salaping kinitaan nga pagpamasahero sa biktima.

Matud pa ni SPO2 Bacayo nga mga alas 9 pasado ang takna sa gabii sa dayong pagsugat sa Bag-ong Tuig ang biktima giluwanan sa duha ka suspetsado gikan sa dakbayan sa Mandaue ug nagpahatod sa dakbayan sa Lapulapu.

Sa paghidangat nila sa dalan S. Osmeña sa barangay Poblacion sa dakbayan sa Lapulapu nga ang usa naglingkod sa luyo ug ang kauban naglingkod sa front seat ang kalit lang nga nag-iyahay og ibot sa kutsilyo dungan ang pagpahibalong tulis.

Ang biktima nga nakahigayon sa pag-abli sa pultahan ang nagdali sa pagkisikisi ug gidunganan sa pagpanukmag dayong sikad sa pultahan hangtod nga nakagawas ug nakadagan.

Ang duha ka tulisan nga nakalitan tulin usab nga nakapanagan apan nasugatan ang mga polis sa Presinto 3  nga nagpatrolya ug si Castro nasikop.