Sinulog month gideklarar
Gideklarar na sa Cebu City Schools Division nga Sinulog Month ang kinatibuk-ang buwan sa Enero.
Subay niini, ang mga tinun-an sa publikong mga tunghaan sa dakbayan musayaw og Sinulog matag buntag human sa flag raising ceremony.
Matud ni City Schools Division Superintendent Doctor Lorna Rances nga kini sugdan sa mga tinun-an atol sa subling pagbukas sa klase karong adlawa.
Tumong ni Rances niini nga masinati sa mga tinun-an ang espiritu sa Sinulog diha sa matag tunghaan sud sa kinatibuk-ang buwan.
“Kay dili man ang tanang mga tinun-an makaapil sa Sinulog festival mao nga aron ma-feel usab nila ang Sinulog pasayawon nato sila,” sumala ni Rances.
“Ang Sinulog will also serve as physical fitness exercise and supplication sa atong kabataan, prayers for peace and progress sa atong siyudad,” matud ni Rances.
Ang deklarasyon sa Sinulog Month sa buwan sa Enero maoy labing unang higayon sa Cebu City Schools Division.
Gipasabot ni Rances nga ang mga maestra maoy motudlo og sayaw sa mga tinun-an ug wala na kinahanglana nga sila mokuha pa og choreographer.
- Latest
- Trending
