Turismo sa Sugbu mas OK sa 2008

Gipaabot nga mo-doble ang gidaghanon sa pagsaka sa turismo dinhi sa Central Visayas partikular na dinhi sa Sugbu atol sa tinuig nga kalihukan sa Sinulog Mardigras dinhi sa dakbayan sa ikatulong semana karung bulana.

Subay kini sa nahipos nga mga impormasyon sa mga tinugyanan sa Department of Tourism (DOT-7) gikan sa mga langyaw nga nagpa-bookings sa mga hotels dinhi sa dakbayan ug Metro Cebu area.

Gibutyag ni Red Gonzales, administrador sa DOT-7 nga gikan lang niadtong miaging bulan sa Nobiyembre hangtud karung Pasko nisaka   og 16 porsiyento ang gidaghanon sa tourist arrivals dinhi sa Central Visayas.

Nagpabiling  mga  Koreano maoy nag-una niini nga niabot na og subra sa 178 mil, dayon gisundan kini sa taga Japan,China ug Hongkong.

Matud ni Gonzales nga napanglantawan nila nga mo-doble pa ang gidaghanon sa tourist arrival karung semanaha sugod sa pagsugat sa Bag-ong Tuig ug ngadto na sa una ug ikaduhang semana sa Enero tungod sa popular na kaayo nga kalihukan sa Sinulog.

Gitumbok ni Gonzales ang nahipos niining impormasyon gikan sa Sinulog Foundation may labot sa tourist arrival gikan sa Amerika nga buot mosaksi sa Sinulog Mardigras.

Laing aspeto nga gitumbok ni Gonzales nga nakapasaka sa gidaghanon sa tourist arrival dinhi sa Sugbu mao ang mga nahitabong gubot-gubot sa ubang mga dapit dinhi sa nasud sama sa Manila nga naka-atract sa mga turistang langyaw nga mo-divert og bakasyon dinhi sa Sugbu tungod sa kahusay ug kalinaw niini.