Waway gikahadlokan sa 2007

Usa sa gikagubtan ug gikahadlokan nga issue sa tuig 2007 mao ang gikatahong serial killer nga si Waway diin nakapatisok sa alimpatakan sa mga katawhan kung unsa gyud kini si Waway. Serial Killer ba o nakahimo lamang og krimen sa dakbayan sa Danao?

Sa nasayran sa Banat News nga si Warlito Toledo alyas “Waway” 33 ang panuigon  residente sa Sitio Banaba, Brgy. Guinsay dakbayan sa Danao diin niadtong tuig 2003 nag-atubang kini og kasong rape, murder ug robbery ug gani hangtod ning pagbalita wala pa gihapopn kini masikop sa kapolisan sa maong dakbayan.

Gumikan niini nahimong most wanted criminal si Waway sa dakbayan sa Danao ug sa lalawigan sa Sugbu   sa maong mga kasong giatubang niini gani gipakatap usab ang hulagway niini sa mga kalungsoran ug sa mga dakbayan sa Lapu-Lapu, Mandaue ug Toledo City.

Ang mga kaso nga gikalambigitan ni Waway nahimong gikahadlokan sa mga residente sa mga silingan nga lungsod sa Liloan, Compostela, Carmen ug sa dakbayan sa Lapu-Lapu, Mandaue, Carcar, Naga ug Toledo gumikan kay nahimong estorya sa mga residente nga si Waway mosud og kabalayan ug mopatay kung kinsa ang moabli sa pultahan nga iyang gitoktok.

Gani kung babaye ang moabli iya kining lugoson ug kuhaan sa iyang suso ug kung lalaki iya kining patyon. Ang dili moabli sa iyang pagpanoktok iyang lud-an ang tsinelas o sapatos nga anaa sa gawas sa pultahan isip pagpamatuod nga diha siya sa maong panimalay ug posibleng iya kining balikan.

Sa maong mga estorya daghan ang nalipay nga mga ginikanan kay sayo nang mahipos ang ilang mga anak gumikan sa kahadlok ni Waway ug gani mga 7:00 sa kagabhion wala nay magtikawtikaw nga kabataan sa maong mga dapit.

Ang uban usab nabalaka sa ilang mga anak nga wala pa mahiuli sa ilang panimalay atol sa kagabhion gumikan kay nahadlok sila nga kini masugatan ni Waway ilabi na kung ang ilang anak usa ka babaye.

Sa pipila ka mga residente nga nahinabi sa Banat News kung nganong hangtod karon wala pa masikop si Waway ang uban kanila mipadayag nga si Waway adunay gahom o anting-anting nga dili nasakpan sa mga otoridad.

Matud pa nga si Waway pwedeng mahimo nga usa ka bitin o usa ka tiki kung adunay mosuway ug dakop kaniya, apan ang kapolisan wala mokumpirmar niini ug wala usab modeklarar nga si Waway usa ka serial killer.

Matud pa ni CPPO Director Superintendent  Carmelo Valmoria si Waway usa lamang ka pinangita sa balaod gumikan sa iyang krimen nga nahimo apan wala sila makadungog nga usa kini ka serial killer ug gani base sa report sa iyang mga  hepe sa mga dapit nga gikahadlokan si Waway walay mga krimen nga susama sa gipakatap sa katawhan nga binuhatan sa usa ka  serial killer diin gitumbok nga si Waway ang suspetsado.

Gumikan sa mga pamahayag sa kapolisan mibalik na ang kalinaw sa mga lugar diin napagya ang presensiya ni Waway ug nawagtang na usab ang mga kabalaka sa mga ginikanan ilabi na sa ilang mga anak nga anaa magtungha o magtrabaho sa mga lagyong dapit ug mouli matag gabii sa ilang panimalay.

Sa uwahing kalambuan nga nahipos sa Banat News si Waway katapusan nasigpatan didto sa kaulohan apan wala kini madungog nga mihimo og krimen sa maong dapit.