Laing fetus napalgan

Una pa nitak-op ang tuig 2007, nadugang sa talaan sa mga gituuhang biktima sa aborsyon ang usa ka unom ka buwang fetus nga nakaplagan diha sulod sa simbahan sa Punta Prinsesa niadtong milabay'ng adlaw.

Ang maong babayeng fetus gisulod og karton ug gibutang sa tiilan sa usa sa mga imaheng santos diha sulod sa Lourdes Parish Church sa maong barangay ug nakit-an sa mga batang nanagduwa sa maong simbahan.

Sila si SPO2 Rogelio Cañete ug PO2 Silverino Beleta sa Police station 10 mao nay mikuha sa maong karton ug gipabendisyunan sa pari sa maong parokya una pa gidala sa punerarya.

Ang maong fetus maoy ika-siyam nga fetus nga nakuha sa bulan sa Disyembre nga mao ang bulan nga giselebrar sa Kristiyanong Simbahan ang adlaw'ng natawhan sa Manunubos.

Si  Arsobispo Ricardo Cardinal Vidal sa iyang homily atol sa pagselebrar sa Misa de Gallo sa siyam ka mga simbahan dinhi sa Sugbu kanunay'ng nanawagan sa katawhan sa pagpangga sa mga bata.

Ilabi na ang mga batang gisabak pa sa ilang mga inahan apan bisan paman niini duna gihapoy mga nakit-an  nga  fetus.

Ang Homicide Section milusad na og imbestigasyon sa maong mga insidente, duna nay duha ka magtiayong gidudahan nilang usa sa mga ginikanan sa siyam ka mga fetus nga nakaplagan sa bulan sa Disyembre.