Tuig 2008 gibase sa tulo ka matang sa ilaga

Gibahin sa tulo ka hulagway ang mga panagna sa giilang Nostradamus sa Asia nga si Jojo Acuin ang mga panghitabo sa tuig 2008 nga gibase niya sa tulo usab ka matang sa mga ilaga.

Kini naglakip sa mga ilaga nga maoy iyang gibasehan sa iyang pagtagna sa 2008  mao ang mga ilaga nga anaa sa balay, mga ilaga nga anaa sa yuta nga sagad makita sa kaumahan ug mga ilaga nga anaa sa kanal o mga basurahan.

Matud pa niya nga base sa mga ilaga nga anaa sa balay maoy masinati ang suliran sa pamilya  ilabi na gyud kadtong mga kabus nga nag-ilaid sa kalisod ang ilang pagkabutang.

Maoy masinati  ang panagbulag sa magtiayon nga walay gipili kabus man o adunahang pamilya nga maoy linugdangan sa kanunay nga walay pagsinabtanay sa usag usa.

Samtang lahi usab ang masinati sa katawhan kon ibase sa mga ilaga nga anaa sa yuta o kaumahan sanglit makahatag man kini sa katawhan og dugang pang kalamboan.

Base gihapon sa ilaga sa yuta o kaumahan maoy iyang panglantaw sa 2008 nga ang mga lumolupyo sa kabukiran makabaton og dakong papel alang sa pagbaton sa kalinaw ug hingpit na nga mabungkag ang mga kaaway sa kagamhanan

Subay gihapon sa panglantaw sa kinaiya sa mga ilaga sa yuta o kaumahan maoy iyang hipanglantawan nga kadtong mga kabus nga mag-uuma nga nangandoy nga makabaton og ilang kaugalingong luna nga matikad mahingpit ang mao nilang pagpanag-iya,

Apan kun ibase usab ang mga panghitabo sa 2008 sa mga ilaga sa  kanal o basura maoy iyang hipanglantawan ni Jojo Acuin ang padayon nga pagka bahin-bahin sa nasud, puno sa pagsaway sa usag usa, makasinati og dakong gutom ug labi pa nga makasinati ang katawhan  og kalisod sa  2008.

Dugang pa ni Jojo Acuin nga sa 2008 maoy iyang  nakita nga ang  mga  adunahan labi pa gyud nga mahimong adunahan ug ang mga kabus labi pa gayod  ang masinati og hilabihan nga kalisod.

Ang Nostradamus sa Asia  nagkanayon nga ang tuig sa ilaga may makabaton man tuod og kalamboan apan sa pipila ka bahin ang pipila ka katawhan magpadayon usab ang ilang pag-antos sa kalisdanan.

Hinuon dako og ikatabang ang mga ilaga sa yuta sanglit mabahig man ang kapalaran sa katawhang Pilipinhon nga mahulagway nga dili kaayo mahingpit ang kalipay apan dili usab hingpit nga masulob-on ang kahimtang sa pagpuyo.

Sa Natad Sa Politika

Sa natad sa politika iyang gipadayag nga adunay gikan sa oposisyon ang mobalhin sa habig sa administrasyon apan pipila usab nga gikan sa administrasyon mobalhin usab pagtipon sa pundok sa oposisyon.

Giawhag usab ni Acuin si Pangulong Gloria Macapagal Arroyo sa pag-amping sanglit makasinati kini og suliran sa panglawas nga gamiton usab nga isyu sa iyang mga  kaatbang sa politika.

Sa Kasundalohan Ug Kapolisan

Sa 2008 hangtod sa 2009  mapahigayon ang dinagkong paglahugay ug magpadayon usab ang pagpangawagtang sa pipila nato ka mga kaigsoonan nga nagbarog og kawsa batok sa atong kagamhanan.

Kini mahitabo pinaagi sa magkalapad nga pagpangdagit sa mga tawo nga dili na motuo sa mga programa nga ipatuman sa kagamhanan nga maoy hinungdan sa ilang padayon nga pagsaway niini.

Kun ang pagpangdagit og mga sakop sa pamilya nga adunahan sa 2007 apan sa 2008 sa gihapon kini magpadayon nga maoy hinungdan nga mga adunahan nga pamilya ang nagkinahanglan sa ilang pag-amping sa kaugalingon.

Sama sa miaging tuig 2007 ang suliran sa ilegal nga drugas sa nasud dili lang kay magpadayon kun dili magkagrabe pa gayod ang maong suliran sa 2008.

Ang kagubot sa Mindanao sa gihapon magpadayon nga kun hingusgan sa kagamhanan sa pagsumpo ginamit ang paghingusog sa operasyon sa armadong kusog sa nasud apan sa gihapon magpadayon.

Dili usab luwas ang nasud batok sa mga terorista sa tuig 2008 ug dako pa gani ang kahigayonan nga pahimuslan sa maong pundok ang kanunay nga panaghuot sa mga sakyanan.

Sa Kahimtang sa Edukasyon

Sa tuig 2008 daghan ang mogradwar sa kolehiyo apan pipila lamang kanila ang makasulod og trabaho.

Samtang giawhag ni Acuin ang mga tinun-an nga motungha sa kolehiyo nga dili mokuhag mga bag-ong kurso sanglit mapuno na kini ug maglisod sa pagsulod og trabaho.

Dugang pa niya nga ang kurso nga komersiyo, education, liberal arts maoy kusog ang panginahanglan sugod sa 2008 hangtod sa 2009.

Sa Patigayon

Ang 2008 maoy labing maayo alang sa negosyo nga naglambigit sa telekomunikasyon, transportasyon, tubig, puthaw, pagkaon, real estate, o negosyo  sa alahas ug publications o publishing positibo usab nga negosyo sa tuig 2008.

Sa negosyo nga small-scale business nga naglakip sa pagkaon dili lang maoy siguroon ang puhonan kun dili ilakip niini ang mga kahimanan, mga tawo ug ang labing maayong mangluto nga kusinero.

Kalamidad o Katalagman

Magpadayon ang mga panghitabo sa landslide sa pipila ka dapit sa nasud, baha  ug mga pagboto sa bulkan nga naglakip sa daghang makalas ang kinabuhi kun ang maong  mga bulkan nga moboto himoon kining tourist attraction.

Gipaabot ang mga pagbuto sa bulkan nga naglakip sa Bikol, Luzon ug pipila sa Visayas nga naglakip sa Negros.

Masinati usab ang linog sa pipila ka dapit sa nasud ug hayan nga daghan ang makalas  sama sa nahitabo niadtong 1990 ug makasinati usab og tsunami ang pipila ka dapit sa Luzon ug Kabisay-an.

Posible usab nga masubli ang nahitabo nga pagkalunod sa M/V Victor ug Doña Paz diin daghang kinabuhi ang nakalas.