Nitabang nga batan-on mao ‘nuoy nalumos

Usa ka 19 anyos nga lalaki ang nisuway og luwas sa tawo  nga naanod sa baha niadtong miaging hapon diha sa barangay Cantipay lungsod sa Carmen mao na hinuon ang nalumos ug namatay.

Si Rodel Pagatgat, residente sa Poblacion Carmen, napalgan nalang sa sapa sa maong dapit gibana-banang 400 metros diha sa gi-construct nga taytayan nga wala nay kinabuhi.

Segun sa report nga midangat sa Cebu Provincial Police Office ang biktima na-report sa kapolisan sa maong lungsod nga na-missing nianang alas 12 sa udto niadtong Biyernes ug pagka alas 2 sa hapon sa susamang adlaw nakit-an ang biktima.

Sa pasiunang pakisusi nga gihimo pinangulohan ni P/Insp. Carlos Reyes Jr. nasayran ang biktima duna diay giluwas nga laing tawo dihang mibul-og ang dakong baha niadtong Biyernes.

Hinuon milampos man tuod pagluwas ang biktima sa iyang gitabang apan siya na hinuon ang nalumos ug naanod sa tubig.

Si Insp. Reyes ingon man ang barangay kapitan sa nahisgutang barangay maoy nangunay pag-ugkat sa patay’ng lawas sa biktima.