Gipadayon sa kapolisan ug Department of Health (DoH) 7 ang kampanya nga higpit pagdili sa pagpaboto sa armas ug ang paggamit sa bisan unsang matang sa paboto pagsugat sa Bag-ong Tuig 2008.
Gihimo kini sa kapolisan dinhi sa rehiyon nga gipangulohan ni Chief Superintendent Ronald Roderos ug Dr. Susana Maderieta nga maoy DOH regional director dinhi sa Region 7.
Nunot sa maong pagdili, ilang gisugyot ang paggamit sa torotot, pagdukdok og lata ug uban pa nga galamiton nga makamugna og kasaba nga maoy hulip sa paggamit og paboto.
Ang ilang kampanya nga “Iwas Paputok” sa pagsugat sa tungang gabii sa Pasko niadtong Disyembre 25 nagpakita nga pipila lamang ka mga biktima sa pabuto ang nalandig sa tambalanan.
Gani sa dakbayan sa Mandaue, Danao ug Lapulapu nga maoy dapit sa Sugbu nga nagpabrika og mga pabuto walay natala nga biktima atol sa pagsugat sa tungang gabii sa Pasko sukwahi kaayo sa nangaging katuigan.
Sa kinatibuk-ang natala sa DOH 102 lang ang nabiktima sa pabuto ug sa saag nga bala.