Nasulbad na sa kapolisan sa Minglanilla ang ilang problema kabahin sa mga sunodsunod nga pagpanglungkab sa maong lungsod human ilang nadakpan ang gipasanginlang mastermind sa akyat Bahay Gang karung semanaha didto sa Liloan Southern Leyte.
Si SPO2 Segismar Razul sa Minglanilla Police Station nga nahinabi sa Banat News miila sa suspetsado nga mao si Josepher Suerte alias Judo temporaryong nagpuyo sa balay sa igsuon sa iyang kapuyo diha sa nahisgutang lugar.
Sa nasayran unang nadakpan sa kapolisan sa maong lungsod ang mga sakop ni Judo nga sila si Gerome Monte, residente sa Duljo Fatima, Ady Lucero nga taga Inayawan ug usa ka lalaking menor de edad.
Sila maoy gitumbok nga milungkab sa panimalay sa Korean National ug sa asawa niining si Jocelyn Candar Kym diha sa Springwood Village barangay Tulay Minglanilla sa miaging bulan diin nasakiyo sa grupo ni Suerte ang tunga sa milyon nga kantidad sa mga alahas ug kuwarta.
Matud pang SPO2 Razul nga duna silay usa ka impormante nga maoy mihatag kanila og tip sa gitagoan ni Suerte didto sa Liloan Southern Leyte.
Hinungdan gipangunayan ni Sr. Insp Romeo Santander uban kang Razul ug laing usa mituyo og adto sa dapit dala ang warrant of arrest sa kasong robbery nga giluwatan ni Judge Sylva Aguerre Padiranga sa Branch 16.
“Wala gyud kaugpo (Suerte) kay bisan among giposasan wala gani siya kamata natayming seguro nga nahinanok,”dugang pang SPO2 Razul.
Si Suerte ug iyang mga sakop maoy gitumbok nga responsable sa mga pagpanglungkab gikan diha sa Mambaling, Basak Pardo ug Talisay.
Matud pa niya nga nakig-alayon na sila sa mga police station diha sa Mambaling, Pardo ug Talisay aron pahibaw-on kadtong mga nabiktima sa grupo ni Suerte.