Pamilyang Villaplaza wa motubag sa CH

Napupos na kagahapong adlawa ang tagal sa notice to comply nga gihatag sa Revenue Task Force sa Cebu City Hall ngadto sa pamilyang Villaplaza.

Gihatag ang maong notisya human masuta sa task force nga walay business permit ang negosyong shellcraft ni Wilfredo Villaplaza diha sa barangay Inayawan.

Nahibaw-an ang illegal nga negosyo ni Villaplaza dihang napatay sa mga sakop sa SWAT team sa dakbayan ang usa sa mga trabahante niini.

Ang nahisgutang trabahante mao si Alejandro Bayarcal nga giingong nisukol sa kapulisan atol sa gihimo niining hot pursuit operation.

Matud sa labaw sa task force nga si Tata Sungahid, wala mupatim-aw sa iyang buhatan ang tag-iya sa shellcraft hangtud kagahapong adlawa.

Tungod niini niingon si Sungahid nga ila nang gi-andam ang closure order alang sa shellcraft ni Villaplaza.

“Amo dayong gi-inspeksyon ang shellcraft ni Villaplaza the day after the incident, wala may business permit,” sumala ni Sungahid.

“Amo silang gihatagan og notice to comply within 3 days nga natapos kagahapon pero wala may mipakita sa opisina,” dugang pasabot ni Sungahid.

Tungod niini walay laing mahimo ang buhatan sa Revenue Task Force gawas sa pagsira sa nahisgutang negosyo ni Villaplaza.

Gitakda sa task force ang pormal nga pagkandado sa shellcraft ni Villaplaza sa adlaw’ng Huwebes sa sunod semana.

Nasayran sa Banat News, nga kagahapon lang nakagawas sa bilangguan ang magtiayong Villaplaza human sikupa sa kapulisan.

Kini tungod sa giingong pagtabang niini kang Bayarcal nga dili dayon masikop sa nigukod niining mga sakop sa SWAT team.

Gawas sa kasong obstruction of justice, gipasakaan usab sa kapulisan ug kalapasan sa child abuse law ang magtiayon.

Kini tungod sa giingong pagpatrabaho sa pamilyang Villaplaza og mga minor de edad diha sa ilang shellcraft.

Nakagawas sa bilangguan ang magtiayon human usab makapyansa sa kaso nga ilang giatubang.