Papa, 3 ka anak dasmagan taxi

Amahan ug tulo ka mga anak nga luwan sa  motorsiklo nadasmagan og taxi duol sa Cebu International Convention Center  sa milabay’ng adlaw.

Ang mga biktima mao sila si Ramonito Arong, 37, minyo nga maoy nagmaneho sa motorsiklo ug ang mga anak niini nga sila si Mary Fatima, 9, Angelica, 8 ug Jay, 4 anyos ug mga residente sa  Looc dakbayan sa Mandaue.

Sa pasiunang imbestigasyon ni PO2 Joselito Catabas sa traffic division sa Mandaue nasayran nga usa ka taxi nga gimaneho ni Lucio dela Cerna Avila, 35, minyo ug residente sa  Bulak, lungsod sa Dumanjug maoy nakadasmag sa mga biktima.

Matud pa ni PO2 Catabas padulong sa dakbayan sa Sugbu ang pamilyang Arong nga nagsubay sa Ouano Avenue sa Mandaue reclamation area duol sa  CICC sa dihang mikalit lang og liko sa walang bahin ang maong taxi hinungdan nga sila nagkaabot sa tungang bahin sa maong dalan.

Maayong pagkalagpot sa mga biktima hinungdan sa ilang nahiagumang mga pangos ug bun-og sa kalawasan diin gidali usab kini og dala sa tambalanan ug hinuon luwas na kini sa makuyaw nga kahimtang.

Samtang si Avila anaa karon sa kustodiya sa kapolisan sa Mandaue ug pasakaan kini og kasong reckless imprudence resulting to multiple serious physical injuries gumikan sa maong insidente.