Polis napatay sa laing polis

Nahimong dugoon ang pagsugat sa Pasko sa usa ka polis nga nang-hostage og tindero og pabuto sa dihang napatay kini sa dihang gipusil sa laing polis atol sa pagsugat sa Pasko niadtong Lunes sa gabii sa Barangay Tisa, ning dakbayan.

Ang napusilan ug namatay mao si PO1 Calvin Dinopol Dinampo, 32, lumad nga taga Samboan, ug nadestino sa Talisay Police Station, ug ang nakapusil niya mao si PO1 Mark Anthony Manlosa, 31, taga San Jose Village, Barangay Tisa ug nadestino sa Tourist Assistance Center sa Cebu City Police Office.

Sa imbestigasyon ni SPO1 Jay Yballe sa Homicide Section, nasota nga si PO1 Manloza nagmaneho sa iyang motorsiklo nga may angkas samtang nagpaingon sa iyang balay sa Tisa.

Nakit-an ni PO1 Manlosa si PO1 Dinampo nga nagsibilyan nga nagbitbit sa iyang pistola nga 9mm hinungdan nga gipangutana niya kini “polis ka bay?” Imbes motubag si PO1 Dinampo gibitad hinuon niini si Allan Añana nga naninda og pabuto ug gi-hostage niini, samtang nagtion sa iyang pistola ngadto kang PO1 Manlosa.

Usa ka estambay sa maong lugar miduol ug nakiglayog kang PO1 Dinampo. Miresulta ang sunodsunod nga boto sa armas, dungan ang pagkahagba ni PO1 Dinampo sa kilid sa karsada nga aduna nay samad pinusilan sa iyang dughan, ibabaw’ng bahin sa walang paa ug ubang parte sa lawas.

Napagan sa bala ang usa ka tuig nga bata nga naigo sa tuong kamot hinungdan nga gidala kini sa Cebu City Medical Center.

Si PO1 Dinampo gihatod sa Miller Hospital sa Miscellaneous Team sa Punta Princesa Police Station, apan gibalhin sa Chong Hua Hospital ug didto na kini namatay pagka-alas 12:30 sa kaadlawon niadtong Martes.

Sa lugar nahitaboan, nakuha ang pistola nga kalibre .45 ug magazine niini nga adunay pito ka buhing bala nga gipanag-iya ni PO1 Manlosa. Nakuha usab ang 9mm ni PO1 Dinampo ug adunay magazine nga adunay siyam ka buhing bala. Nakuha usab ang siyam ka kabhang sa kalibre .45, usa ka kabhang sa 9mm ug lima ka slug nga nabungkag.

Si Supt. Pablo Labra II, deputy for operations sa CCPO, nagkanayon nga molusad sila og pakisusi sa hitabo, apan determinado nga mopasaka og kasong reckless imprudence resulting to homicide si PO1 Manlosa.

Gitataw hinuon niya nga usa ka lehitimong alarma ang gitubag ni PO1 Manlosa tungod sa nakita niining tawo nga nagsibilyan nga nagbitbit og armas.

Sumala pa ni Labra nga aduna hinuoy sayop si PO1 Manlosa tungod kay wala kini manawag og back-up.

Matud pa hinuon ni Labra nga adunay saksi nga andam mobarog nga si PO1 Dinampo nakita gyud nga nagwarawara sa iyang 9mm nga pistola sa wala pa mahitabo ang pamusil.

Matud pa niya nga susihon sa mga imbestigador nganong daghan og igo si PO1 Dinampo nga ang tuyo unta mao lang ang pag-“neutralize” niini sa dihang nang-hostage kini og tindero og pabuto.

Si Supt. Romeo Perigo, hepe sa Talisay Police Station nga gidestino sa napatay’ng si PO1 Dinampo, miawhag sa Criminal Intelligence and Investigation Branch sa CCPO sa paghimo og makiangayong imbestigasyon sa pagkamatay sa iyang sakop.