Namaligya'g pabuto naguol sa ilang alkanse

Mokabat sa 60 porsiyento ang alkanse sa halin sa pagpamaligya og mga paboto sa barangay Babag, dakbayan sa Lapulapu sa miaging pagsaulog sa Pasko.

Kini ang gipadayag ni Grace Pungasi, lisensiyado nga tiggama og pabuto kinsa miingon nga ang ilang mga retailer mipadayag og alkanse sa ilang pagpamaligya.

Hinuon ilang gilauman nga kusog ang halin sa ilang gibaligya nga mga pabuto sa umaabot nga pagsugat sa Bag-ong Tuig sanglit ilang gituohan nga daghan ang magpabuto.

Ang higpit nga pagpatuman sa mga lagda sa kapolisan labot sa pagpamaligya og pabuto ang magpadayon hangtod sa pagsugat sa  Bag-ong Tuig.

Kini ang gipadayag ni Supt. Louie Oppus, hepe sa kapolisan sa Lapulapu  kinsa miingon nga ilang ipadayon ang pagpasiugda og mga surprise inspection sa mga pabrika ug mga tindahan nga nagpahiluna sa pag-display sa mga pabuto.

Si Dr.Susana Maderieta, director sa Department of Health (DOH-7) miingon nga ang subsob nga kampanya sa paglikay sa paggamit og pabuto maoy usa sa mga hinungdan nga mikubos ang biktima sa pabuoto sa pagsugat sa Pasko karong tuiga.

Dugang pa niya nga ilang ipadayon ang pag-awhag sa katawhan dinhi sa rehiyon nga inay mogamit og pabuto sa pagsugat sa Bag-ong Tuig maoy ilang isugyot ang paggamit sa torotot aron kalikayan ang aksidente.