Lalaki biktima sa salvage

Napalgang naligo sa kaugalingong dugo ang usa ka lalaki kinsa gipusil patay sa miaging gabii sa sitio Kauswagan, barangay Bankal, dakbayan sa Lapulapu alas 12 pasado ang takna sa miaging gabii.

Ang biktima mao si Jerino Rosales, 39,  nga lumad nga taga Daan Bantayan ug temporaryong nagpuyo sa maong dapit.

Si PO3 Joseph Damasco nga gihinabi sa Banat News miingon nga gipusil ang biktima sa wala pa hiilhing mamumuno kinsa dali usab nga nakapahilayo.

Dugang pa ni PO3 Damasco nga usa ka Theodore  Ybanez nga nagpuyo sa maong dapit maoy unang nakakaplag sa patay’ng lawas sa biktima.

Matud pa niya nga nakabaton og samad pinusilan sa aping ang biktima ug miungot ang bala nga gituohang maoy nakaingon sa kamatayon niini.

Sa pamahayag ni Ybañez ngadto kanila ni SPO2 Rolito Jumao-as sa homicide section maoy nasayran nga nabati nila nga mga residente sa maong dapit ang boto sa armas.

Nagtuo lamang  sila nga firecracker ang maong boto apan dihang gihimo ang pakisusi maoy nadiskubrehan ang patay’ng lawas sa biktima.