Gilugos human siya gikulata sa ig-agaw

Gisumbag  hangtud nawad-an og panimuot ang usa ka menor de edad nga babaye una pa kini among-amongi sa usa ka lalaking midala kaniya paingon unta sa apuhan niining babaye.

Kini nahitabo niadtong Huwebes sa gabii diha sa kasagbutan sa barangay Marangub dakbayan sa Bogo.

Dunay traysikol ang naagi sa dapit ug gidala sa police station si Angel, 16,  tinuod nga pangan gipugngan sa Banat News, residente sa usa sa mga barangay sa maong siyudad.

Samtang ang gitumbok nga milugos sa biktima mao ra ang 19 anyos niining ig-agaw.Segun sa report nga gipadangat sa Cebu Provincial Police Office (CPPO) nga nianang pasado alas 7 sa gabii niadtong Huwebes ang biktima gikombinser  sa suspek nga mangadto sa nahisgutang barangay aron  bisitahon ang ilang apuhang  babaye.

Apan sa dihang naabot na sila sa nahitaboan nga niadtong tungora ngitngit  kalit lang gibitad  sa suspek ang biktima paingon sa kasagbutan ug didto gisukmag sa makadaghang higayon.

Matud sa taho, sa dihang nawad-an na og panimuot ang biktima,  gipahimuslan dayon sa suspek ang biktima.

Human  milampos ang suspek dali kining nakapahilayo sa dapit ug gibiyaan lang ang biktima apan maayo nalang gani kay dihay traysikol nga naagi ug nakit-an sa driver ug mao nay midala sa biktima ngadto sa police station aron itaho ang maong insidente.

Ang kapolisan  daling mihimo og follow-up operation didto sa pinuy-anan sa suspek apan wala na nila maabti.

Si PO3 Ramonito Canja, sakop sa Alert Team sa Bogo police station nga nahinabi sa Banat News mitug-an nga ang suspek misurender niadtong Biyernes sa gabii gikuyogan sa iyang amahan.