Hot meat bantayan

Gipahimangnoan sa kadagkuan sa National Meat Inspection Services (NMIS-7) ang publiko nga magmatngon ug dili magpataka og palit og karne ilabina karun nga nagkaduol na ang Pasko.

Daku ang pagtuo ni NMIS-7 director Dr. Romeo Capa nga dunay mga negosyante ang mopayuhot og mga hot meat kon depektusong karne nga ipamaligya sa kamerkadohan tungod sa pagtaas karun sa demand niini.

Gitambagan ni  Capa ang publiko nga kun mopalit og karne diha sa kamerkadohan o bisan asa nga dapit siguradohon gyud niini nga duna kiniy tatak ingon man dunay ikapakita nga meat inspection certificate ang nagbaligya niini.

Partikular nga gitumbok ni   Capa ang mga gi-import nga karne gikan sa gawas sa nasud.

Nunot niini gipadayag ni Dr. Capa nga nagpadayun gihapon ang mga sakit sa kahayopan didto sa gawas sa nasud sama sa foot and mouth disease (FMD) ingon man bird flu virus.

Nasayran nga dili palang dugay nakasakmit og kinahun nga mga karneng baboy ang grupo ni City Veterinary  Alice Utlang gikan sa nasud sa Brazil nga gihulagway’ng dili haom kan-on sa publiko.

Nunot niini gidasig sa director ang mga hingtungdang lokal nga kagamhanan pagpalapad sa kampanya ug monitoring niini batok ning posibleng pagsulod sa hot meat sa kamerkadohan ilabina karong Pasko ngadto na sa Bag-ong Tuig.