Nagdala'g ‘shabu’ sikop sa tagbalay

Usa ka traysikad driver nga nisulod sa balay ang nadakpan hinuon sa tag-iya sa panimalay ug nakuhaan kini usa ka putos sa  gidudahang   shabu diha sa iyang bulsa  diha sa Poblacion dakbayan sa Danao.

Ang nadakpan ug nakuhaang usa ka pakete sa shabu og gi-turn over sa Danao Police Station giila   si Rene Quijano, 21, usa ka traysikad driver ug residente sa Looc sa maong dakbayan.

Segun sa report si Quijano giingong misulod sa panimalay nga gipanag-iya ni Jeffrey Batoon.

Apan walay suwerte kay nabantayan si Quijano sa tag-iya hinungdan nga si  Batoon mismo ang midakop ug sa dihang girekisa nakuhaan ang suspek og usa ka pakete sa shabu diha sa iyang posisyon.

Matud sa taho nagtuo si Batoon nga dunay  panguhaon nga mga butang si Quijano sa ilang balay kung wala pa niya kini makit-ing misulod.