Polis, konsehal gireklamo

Usa ka 38 anyos nga lalaki ang midangop sa buhatan sa Minglanilla Police Station ug mipasangil nga giharas siya sa usa ka polis nga security detail sa mayor sa maong lungsod uban sa usa ka konsehal.

Nahitabo kini niadtong Miyerkules sa gabii diha sa sitio Bacay barangay Tulay lungsod sa Minglanilla.

Apan buntag nang nagpa-blotter si Juvelito Franza, residente sa maong dapit sa buhatan sa kapolisan kabahin sa maong hitabo nga siya gitionan ni SPO1 Frumencio Abug kinsa niadtong tungora giingong kuyog ni Minglanilla Councilor Ramsey Sayson.

Si SPO1 Abug  security detail ni Mayor Eduardo Selma.

Segun sa report nga gipadangat sa Cebu Provincial Police Office, base sa gihimong pakisusi sa kapolisan si Franza niadtong gabhiuna sa Miyerkules pasado alas 8 si SPO1 Abug giingong  kalit lang miduol kaniya dayong tion sa armas de fuego.

Apan ang biktima nisuway og ilog sa armas hangtud iya kining nakuptan ug nibuto ka usa ka higayon paingon sa taas ang bala niini.

Si Franza nidugang sa pasangil nga hubog niadtong higayona si SPO1 Abug.

Matud sa taho nga gisuwayan unta sa pagdala si Franza ni SPO1 Abug paingon sa nag-parking nga sakyanan.

Niining higayona si konsehal Ramsey Sayson matud pa nga kuyog sa maong polis ang niapil usab sa maong kagubot.

Ang mga residente sa dapit kinsa gikatahong niapil hinungdan nga nakahigayon si Franza sa pag-ikyas tungod kay dad-on na unta siya sa sulod sa barangay hall.

“Nadestino na diri sa Minglanilla pero wala na sa polis Station ma-asign (SPOI Abug) tua na siya ni Mayor Selma,” matud pang PO3  Allen Garciano.

Ang Banat News misuway kontak sa munisipyo apan bisi kaayo ang linya sa telepono sa pamasin nga naa si SPO1 Abug ug konsehal Sayson aron makuha ang ilang habig.