Laing disgrasya, 2 patay

Duha ang nakalas ug pito kia mga tawo ang nangaangol human mibangga ang Izusu Elf sa gikasugat nga pasaheroang minibus.

Nahitabo kini kagahapon sa buntag diha sa sitio Bakhao Catmon Daan, lungsod sa Catmon Sugbu.

Usa ka Armid Joriza kinsa naangol apan wala na magpahatud sa tambalanan tungod kay gamay ra, mituyo ug adto sa buhatan sa kapolisan ug nagpahibalong naapil siya sa maong aksidente sakay sa minibus

Si Belinda Baclayon Nurse on Duty sa Danao sa pakighinabi sa Banat News pinaagi sa telepono miila sa namatay nga bata nga si Ryan Arnejo Medalla, 6, ug naangol usab ang amahan niining si Recion Medalla kinsa usa ka barangay konsehal sa Bulwang lungsod sa Tuburan.

Samtang wala pa  mailhi sa mga nurse ang laing namatay nga usa ka babaye gibana-banang nagpangidaron 50 ngadto sa 60 ug nagsul-ob og slacks.

Matud ni Baclayon nga nakaangkon og  grabeng kadaut sa ulo ang duha nga namatay pag-abot sa maong tambalanan.

Si PO1 Allan Menchavez nga nahinabi sa Banat News base sa ilang gihimong pakisusi ang Izusu Elf  gimaneho ni Reynaldo Nulla, residente Bakhawan, Daanbantayan gikan sa amihanang bahin sa Sugbu ug paingon sa dakbayan nga nagkarga og binanyerang isda.

Pag-abot sa nahisgutang dapit kalit lang ni-overtake og laing sakyanan si Nulla apan naapiki dihang gikasugat niini ang “MaryJoanne” minibus nga gimaneho ni Jesus Pepito nga taga Macaas, Catmon.

“Diha gyud siya moigo sa luyo sa drayber sa minibus ang Elf, tanus-tanos naman unta dihang dapita naapiki lang seguro, unya kusog sab nga dagan sa Elf” dugang pang PO1 Menchavez.

Si Nulla gikatahong dunay bali sa  iyang tiil ug si Pepito dunay samad sa nawong gituuhang naigo sa tipaka sa bildo sa samin ang gibalhin usab sa Vicente Sotto Memorial Medical Center sa dakbayan sa Sugbu.

Dali silang gipangdala sa Danao District Hospital apan si Nulla gi-refer sa mga mananambal sa dakbayan sa Sugbu lakip sa laing babaye nga pasahero kinsa nasamad sa bukton.

Matud ni Baclayon nga dunay mga nangaangol nga ubang pasahero apan nakagawas ra dayon human natambalan ang ilang mga samad nga nahiaguman.

Matud ni PO1 Menchavez ang mga sakay sa Elf nga tag-iya sa mga isda wala gyud maunsa sa maong aksidente. (Uban sa report ni Romeo T. Limpangog)