Referee gidapog sa asst coach sa Arthro

Gikatakdang mag-atubang unya og kasong slight physical injury ug grave threats  ang assistant coach sa Arthro Kontra Arthritis ballclub.

Kini human si international basketball referee Raleigh Relator gikatakdang mosang-at unya og kasong kriminal batok ni Lozano, human siya gidapog niini  ka duha niadtong milabay’ng Miyerkules sa 2007 MVBA Christmas Cup diha sa New Cebu Coliseum diin  napukan sa Holcim Pryce Pharma-MisOr Moneygram ang Arthros sa score 88-93.

Ang maong insidente gipa-blotter ni Relator sa Carbon Police Station niadtong Miyerkules sa gabii human sa duwa sa dihang nagpakurasyon siya sa Cebu City Medical Center gumikan sa paghubag sa  iyang tangkugo.

Matud pa ni Relator nga human sa maong duwa iyang gihubo ang iyang sapatos didto sa ilang dug-out sa dihang kalit lang mitunga si Lozano ug midapog sa iyang tangkugo  hinungdan nga nahapla siya sa sawog ug nawad-an sa panimuot sa makadiyot.

Gani usa usab ka referee nga si Ariel Bermeo, kinsa wala mag-officiate niadtong tungora  gihapak ni Lozano sa dughan samtang  nag-text niadtong higayona.

‘Pagkatapos niya akong sinapak, bumagsak ako  at nawalan ng malay. Siyempre masakit ang aking loob. Fair naman ang officiating. Nagtatrabaho lang kami rito. Di naming alam ang two teams. Ganyan talaga ang laro, may manalo, may matalo. Kaya lang dinidibdib niya.”

Dugang pa niini nga dunay usa ka higayon sa maong duwa nga miprotesta si Lozano pinaagi sa paglabay og mineral  water sa korte hinungdan nga nagtoo siya nga gikasuko usab niini.

“Ako ang tumawag ng technical kaya yun seguro ako ang napaglibangan,” si Relator miingon.Gani sa wala pa mobiya si Lozano sa korte miluwat usab kinig pamahayag nga mihulga kaniya nga “I- Salvage kita dito sa Cebu.”

Nunot sa maong hitabo si MVBA Commissioner Jose “Boy” Murillo mipadayag nga dili makaayo ang gihimo ni Lozano gumikan kay maghatag kinig bating sumbanan sa liga.

Hinungdan nga ang Arthro gi-sanction ug gi- scrap sa duwa niini sa miaging gabii batok sa Malabon-Spring Cooking Oil ug automatic ang Malabon-Spring maoy nakadawat sa third place sa maong duwa.

Nasayran nga si Relator usa kini ka taga Roxas City, Capiz ug beterano na og 13 ka tuig sa maong trabaho gumikan sa iyang amateur ug commercial nga liga nga gisalmutan dinhi sa nasud sama sa NCAA, UAAP, NCRAA, NBC, NBL, MVBA, ingon man uban pang mga duwa sa gawas sa nasud. Si Lozano incumbent nga kagawad sa Labangon.