Traysikol vs mini-bus; 2 patay, 1 angol

Usa ka drayber ug usa sa upat ka pasahero ang nakalas sa dihang nabanda sa lubot sa pribadong trak ang usa ka traysikol nga nadasmagan sa naghaguros nga mini-bus sa National Highway, Barangay Inayagan, Naga.

Ang namatay dihadiha mao ang drayber sa traysikol nga giila sa kapolisan nga si Ricardo Bariquit, nga taga Tuyan ug ang nakabsan sa kinabuhi duha ka oras ang nakalabay sa South General Hospital mao si Maria Luisa Singco, taga barangay Tuyan, samtang pabiling giatiman sa mga doktor sa mao gihapong tambalanan sila si Angel Cabarubias, 26, Gwendolyn Laput, ug Carme Birao, pulos residente sa Tuyan Naga.

Si SPO1 Bienvenido delos Santos mitug-an sa mga tigbalita nga base sa ilang gihimong pakisusi sa nahitaboan si Bariquit gikan sa habagatan   ug pag-abot sa nahisgutang lugar kalit lang  mi-u-turn ug wala makabantay nga nagpaingon kaniya ang mini-bus nga gimaneho ni Angelito Carbonel, residente sa barangay Gahad, Sibonga.

Ang mini-bus gikan sa Sibonga ug paingon sa dakbayan sa Sugbu.

Matud ni delos Santos nga niadtong tungora pagkaigo sa traysikol sa mini-bus si Bariquit deretso og kalabay sa aspaltadong karsada nga maoy nakaingon sa hinanaling kamatayon.

Midugang si delos Santos gumikan sa kakusog sa impak ang traysikol midasmag sa lubot sa gikasugat niining private truck nga may  plate no. GSD 348, nga gimaneho ni Dario Ubas, nga taga Cantao-an sa samang siyudad.

Ang upat ka mga sakay ni Bariquit lakip na ni Singco gidali paghatod sa General Hospital aron mapatambalan apan si Singco pagka alas 8 duha ka oras ang nakalabay nakabsan gyud sa iyang kinabuhi gumikan sa grabeng naangkon niining mga bun-og.

Samtang ang laing tulo pabilin gihapong giatiman sa mga doktor human makaangkon og bun-og ug samad  sa kalawasan.

Sumala pang SPO1 delos Santos si Bariquit misutoy og padagan sa gimaneho niining minibus ug diha na mosurender sa Minglanilla Police Station gumikan sa kahadlok nga kulatahon sa mga estambay sa dapit.

Dali usab gi-turn over si Bariquit ngadto sa Naga Police Station samtang nagpaabot nga mapasakaan og kaso.