P1.5M danyos sa sunog

Mokabat sa P1.5 milyones ang danyos sa nasunog nga mga  establisamento nga naglakip sa Lami-a Filipino and Sea Foods Restaurant sa barangay Basak, dakbayan sa Lapulapu nga gialarma sa kabomberohan alas 4:45 kagahapon sa kaadlawon.

Si SFO1 Cecilio Torrifil nga gihinabi sa Banat News miingon nga si City Fire Marshal Ricardo Cornelio mipaubos sa maong sunog ngadto sa 3rd alarm ug nakontrolar sa paglabay sa 3 minutos.

Kini gihimo ni Chief Inspector Cornelio sa kabalaka nga motapon ang kalayo sa kasikbit nga kabalayan nga gisalipdan lamang sa firewall sa nasunog nga establisamento.

Ginama sa light materials ang maong restaurant nga nasunog nga maoy hinungdan nga dali lamang kaayong mikaylap ang kalayo nga mitapon ngadto sa tapad nga mga establisamento.

Si SFO1 Torrefil miila sa uban pang establisamento nga nasunog nga naglakip sa Island Venture International Association, Network Corporation ug usa ka residential building nga gipanag-iya ni Fernando Ochea.

Matud pa ni Torrefil nga ang duha ka multicab  nga gipahimutang sa parkingan nga wala na makuha sa maong lugar ang nalakip usab sa nasunog.

Si SFO1 Torrefil mibutyag nga nagsugod ang kalayo gikan sa personal computer sa buhatan sa maong restaurant nga ilang gituohang nag-short circuit nga maoy nagmugna og kalayo.

Naglakip sa nagtinabangay sa pagpawong nga mga bombero mao ang dakbayan sa Mandaue, lungsod sa Cordova, Emergency Rescue Unit Foundation (ERUF) ug uban pa.

Hinuon si Torrefil miingon nga atol sa pag-ulbo sa kalayo walay gikatahong kinabuhi nga nakalas o naangol.

Sa laing bahin, si Josephine Cabahug, manager sa nahisgutang restaurant nagkanayon nga kung sila ang basehan mokabat sa P10 milyones ang danyos sa maong sunog gumikan sa mga mahalon nga ekipo lakip na niini ang duha ka sakyanan nga nasunog.