Wala mahinayon ang arraignment sa kaso ni PO1 Blaire Quezon nga pagpanuborno sa kaubang polis kagahapon human niduso og motion si Atty. Mary Grace Bactol atol sa gitakda untang arraignment kagahapong adlawa sa sala ni Regional Trial Court (RTC) judge Ester Veloso.
Apan sa wala pa aprobahe ni Judge Veloso ang maong motion gipahimangnoan una niini ang habig sa depensa nga sundon ang hustong lagda pagduso og susamang motion for postponement nga ipahigayon tulo ka adlaw sa dili pa ang gitakda nga arraignment.
Gitakda ni Judge Veloso ang arraignment sa maong kaso sa petsa 15 sa bulan sa Febrero sunod tuig aron hatagan una og higayon ang Ombudsman Visayas nga makapahigayon og preliminary investigation sa kaso.
Si PO1 Quezon nag-atubang og kasong kalapasan sa Akta Republika RA-3019 kon Anti Graft and Corrupt Practices Act.
Kini tungod sa giingong pagsuway og suborno niini ngadto sa kaubang polis aron pakunhoran ang kasong ipasaka batok sa suspetsadong tigpayuhot og gidiling drugas nga si Cleofe Samonte Racaza.
Si Racaza nasikop didto sa dakbayan sa Talisay niadtong petsa 7 niining bulana tungod sa pagpamaligya og gidiling drugas.