Negosyante sa Argao gipatay samtang nag-text

Patay ang usa ka negosyante ug numero unong konsehal sa barangay Lapay, lungsod sa Argao  human gipusil sa miaging gabii samtang nag-text  sa cellphone gawas  sa ilang panimalay.

Ang biktima giila nga si Buenaventura Lanticse Jr., 43  nagpuyo sa maong dapit.

Si SPO1  Jaime Mendoza miingon nga nag-text sa cellphone ang biktima sa dihang ang wala mailhing  lalaki kalit lang mitumaw ug namusil sa makaduha ka higayon.

Nakabaton og samad pinusilan sa dughan ang biktima ug dali kining gidala sa Isidro Kintanar Memorial District Hospital sa maong lungsod apan gideklarar kining  patay sa mga doktor.

Matud pa ni  SPO1 Mendoza nga naglisod sila pag-ila sa mga  mamumuno sa biktima sanglit walay nakakita nga mga sakop sa pamilya o  mga silingan atol sa pagpamusil.

Si SPO1 Mendoza miingon   nga subay sa nahipos niyang kasayuran sa maong lugar nga ang biktima maoy giila nga labing maayong tawo ug  matinabangon sa mga silingan.

Nagtuo ang mga sakop sa pamilya nga walay kalambigitan sa politika ang kamatayon sa biktima gawas lang sa kasina sa negosyo nga kopras.