Napiling bag-ong LTFRB-7 director taga Iloilo

Posibleng duna nay molingkod nga bag-ong Land Transportation Franchising and Regulatory Board kon LTFRB-7 director sa sayong bahin sunod tuig.

Kini tungod kay duna nay gi-endosar ang kalihim sa Department of Transportation and Communications kon DOTC nga si Leandro Mendoza alang sa maong posisyon.

Ang number two man sa LTFRB-Iloilo nga si  Rommel Duron, maoy girekomendar ni Mendoza ngadto sa Malacañang subay usab sa  sugyot  ni kanhi LTFRB-7 director Rogelio “Jingjing” Osmeña.

Matud ni Osmena nga si Duron maoy iyang girekomendar sa nahisgutang posisyon tungod kay giingong walay kwalipikado niini nga empleyado sa LTFRB-7.

Miingon si Osmeña nga walay mi-apply usab nga taga Sugbu sa maong katungdanan hinungdan nga taga laing rehiyon ang iyang giduso.

Walay girekomendar si Mayor Tomas Osmeña sa maong posisyon tungod kay kini  giingong dili gusto nga mapahawa ang iyang ig-agaw sa katungdanan.

Naobserbahan ni Jingjing Osmeña nga wala makauyon ang number two man sa LTFRB-7 nga si Attorney Douglas Sanson sa gihimo niyang rekomendasyon hinungdan nga mihimo og mga lakang si Sanson alang sa pagdaut kaniya uban sa kakumbuya niini nga taxi operator.

Ang gitumbok ni Osmeña mao ang gilambigit kaniya nga franchise scam, diin ubay-ubay nga mga prangkisa ang giingong gi-issue niini taliwa sa gipatuman nga moratorium.

Apan gitataw sa kanhi LTFRB-7, nga ang iyang trabaho ministerial lang ug igo lang sa pagpirma sa mga dokumento nga moabot sa iyang buhatan.

Gisuwayan og kuha sa Banat News ang habig ni Samson bahin sa giingong pagdaut kang Osmeña apan pakyas ang maong tinguha.