Ang mga molupyo sa Aloguinsan wala malisang sa pagpanghadlok sa lider sa usa ka cause oriented group nga matud pa ang lapok nga hinabwa gikan sa ilawom sa dagat sa gikubkob nga tinubdan sa petrolyo sa ilang lungsod makahilo.
Matud pa ni Bise Mayor Chuncie Moreno sa Aloguinsan nga kasagaran sa mga molupyo sa Aloguinsan bisan kabus kay mananagat man ug mag-uuma, apan hamtong na og pangisip ug dili motuo sa mga estorya nga walay unod.
Matud pa niya nga nasayod na ang tanan nga walay butang ilawom sa yuta nga makahilo ilabi na ang yuta nga anaa sa ilawom sa dagat sama sa hinabwa kun “drill cutting” sa Japan Petroleum Exploration Co. Japex.
Ang maong pamahayag may labot sa pasangil ni Vince Cinches, ang presidente sa Fisherfolk Development Center Inc, kinsa nanghadlok nga ang baki nga nagsuroysuroy sa daplin sa lungag nga gitambogan sa maong mga hinabwa, mikirig ug namatay kay nahilo sa maong hinabwa.
Gipanghimakak kini ni Moreno kay matud pa niya naa may mga kabaw, baka, kanding, baboy ug uban pang hayop nga magsuroysuroy sa palibot sa lungag apan wala malanag.
Hangtod na lang sa Disyembre 22 o 23 kutob ang pagkubkob sa Japex kay naabot na nila ang 3,000 metros nga lungag nga maoy ilang gitakdang gilawmon sa tinubdan sa petrolyo nga ilang nadiskubre karon sa maong kadagatan.
Inighuman niini mobiya sila diha sa maong lugar ug langkaton nila ang ilang gitarok nga plataporma o oil rig ug mobalik sila mga lima ngadto sa unom ka tuig gikan karon alang sa hingpit nang operasyon sa paghabwa na sa asayte.