BID agents gitaktak

Duha ka mga ahente sa Bureau of Immigration and Deportation (BID 7) gitaktak na sa ilang trabaho sa maong buhatan human kini giakusahan nga nangilkil sa usa ka Koreano.

Si BID 7 Regional Director Geronimo Rosas sa pakighinabi sa Banat News nagkanayon nga base sa mando gikan sa ilang buhatan sa BID pormal na nga gitaktak sa ilang trabaho sila Mabert Impas ug Daniel Gumba isip mga confidential agent sa maong buhatan gumikan sa kasong ilang gikalambigitan sa pagpangilkil sa usa ka Korean national nga si Lee Dong Bum sa milabay’ng   bulan.

Samtang si Dilausan “Dino” Montor, immigration officer, padayon gihapon ang kasong administratiba niini sa ilang buhatan gumikan usab sa maong kaso.

Matud pa ni Rosas ang ilang buhatan sa kaulohan magpaabot na lang kini sa resulta sa gipasakang kasong kriminal sa National Bureau of Immigration ngadto ni Montor sa Ombudsman ug mao unya kini basehanan sa ilang paghatag og silot.

Kahinumduman nga si Montor, Impas ug Gumba gitumbok sa usa ka Koreano nga maoy nangilkil kaniya og P500 mil  bugti sa paghikay sa iyang mga papeles sa buhatan sa BID, apan ang NBI mihimo kini og entrapment operation hinungdan sa pagkasikop sa tulo ka mga immigration agents.